Weightlifting-a Medal la te Minister in a lawmpui

Sports & Youth Services Department changtu Minister Lalnghinglova Hmar chuan ‘Khelo India Tribal Games 2026’ neih zawh taka a Mizoram tana Weightlifting a Medal la mi pariat (8) te chu Ningani khan a Pisa-ah a lawmpui.

Khelo India Tribal Games (KITG) 2026 hi March 25, 2026 atanga April 3, 2026 chhung khan Chhat-tisgarh-a Raipur, Jagdalpur leh Surguja-ah te neih a ni a. Hetah hian India ram State hrang hrangte infiamna chi hrang pasarihah inelna neih niin Mizoram hian Football, Hockey, Weightlifting, Wrestling leh Athletics-ahte infiammi 69 a tir a. Mizoram hian KITG 2026-ah hian Weightlifting buikah Gold 4, Silver 3 leh Bronze pakhat a la a, a tawp dawn ni thleng khan inelna dangah Silver Medal pahnih leh Bronze Medal pahnih te la tawh bawkin a pumpuiah pasarihna an hauh mek a. Weightlifting-a Gold Medal la zingah hian Serchhip District-a Keitum khua Zosangzuali telin kg 86+ Category (Women)-ah Gold a la a ni.

Sports Minister Lalnghinglova Hmar chuan, “Vawiin ang hi kan nghakhlel a, thil lawmawm tak a ni. Chutihrualin a pawimawh lai chu Medal la tura kan thawhrimna leh kan tumna hi a ni,” tiin “Kan lawmna tizualtu chu tun tum KITG a Medal kan hmuhna discipline pathum hi Empowering Mizoram Sports kan kalpui mekna, sport discipline ngaih pawimawh tur kan thlan zing a mi vek kha a ni. Weightlifting kan che tha ber a, wrestling leh hockey ten an dawt a ni,” a ti bawk.

Sports Minister chuan National Games lo awm tura medal lak theihna neite tan nutrition leh thildangah te inbuatsaihna tha zawk neih theihna turin hma lak mek a nih thu pawh sawiin, “National Games hi kan thenawm State in thlen a tum a, India hmarchhak State ten game pakhat zel kan chan ve theih dawn avangin keini in Weightlifting hi kan thleng dawn a, Weightlifting ah nasa zawkin tan kan la dawn a ni,” a ti bawk.