Leithum Haw Runpui A&C Minister hovin hman a ni

Champhai District chhunga awm Leithum khua chuan nimin khan ‘Leithum Haw Runpui’ an nei a, he hun hi Art & Culture Minister C. Lalsawivunga leh Bialtu MLA, Ramthanmawia te chuan an hmanpui a ni.

Leithum Community Hall-a ‘Leithum Haw Runpui’ khuallian nia hmanpuitu Art & Culture Minister C. Lalsawivunga chuan Leithum khua hian Sakhuana ah, Zirna ah, Sawrkar leh ram rorelna thlengin mi chhuanawm tak tak a hring chhuak tawh tih sawiin, “Khua leh tui tha nih hi thil hlu leh pawimawh tak a ni,” tiin an khaw mi leh sa te chu awmna hmun theuhah intodelh duhna thinlung pu a, thahnemngai taka mahni hma zawn ah rinawmna vawng tlat a, an eizawnna kawng theuhah hmasawna rahbi rap tur leh intodelh khua ni a, khaw dangte entawn turin rinawmna nen hma la turin a chah a. Haw Runpui hi in unauna, in hmangaihna tipungtu ni tur leh thlarau leh taksa lamah hmasawnna thlentu a nih thu sawiin, hlim taka hmang turin duhsakna a hlan a ni.

He hunah hian Khual zahawm leh Bialtu MLA Ramthanmawia chuan khawtlang hma-sawnna tura zirna kawnga tan lak a tul zia te, Ramngaw leh tuihna humhalh tul zia te, Ruihhlo in kan ram leh hnam a tihchhiat nasat zia leh khaw-tlang tangruala do a tul tawh zia te, dik taka sum leh pai lakluh a that thu leh sum leh pai lakluh ang ang te khawl nachang hriat a that zia te sawiin, Leithum Haw Runpui hmang tura kalkhawmte chu duhsakna a hlan bawk a ni.

Leithum khua hi khaw hlun tak niin Hualngo Lal Hualzasela (Pa Huala) leh a thuihhruai ten kum 1896 khan an luh tan nia hriat a ni a, kum 1996 khan an khaw kum 100-na Centenary lawm tawhin tunah hian kum 130-na an hmang mek a. Nimin-a Haw Runpui-ah hian Leithum khua ti hmingthatute chawmimawina hun hman nghal a ni bawk.