Pathian in mal min sawm a, kuhmum hman meuh lovin kan par nghal mawlh mawlh - Chief Minister

Chief Minister leh ZPM Leader Lalduhoma chuan Congress leh MNF te chu an kuhmum rei lutuk nia sawiin, “Keini erawh chu kuhmum hman meuh lovin kan par nghal mawlh mawlh mai a ni,” a ti.
Nimin khan Hriangtlang khua ah Hrangturzo Bial West Block Conference leh Political Training neih niin he hun a hmanpuina ah ZPM Leader Lalduhoma chuan tunlai hian eptu lam ten ZPM chu 'Kan kuhmumah an par,' tiin sawrkar hmalakna tam tak chu an lo ruahman sa niin an sawi thin tih a sawi a. “Keini sawrkar hi Pathian in mal min sawm a, kan sawrkar hlawt a, hlawtlinna tam tak kan chang nghal a. Congress leh MNF te kha an lo kuhmum rei lutuk a, keini erawh chu kuhmum hman meuh lovin kan par nghal mawlh mawlh mai a ni,” a ti a. “Pathian malsawmna kan dawng nasa em em a. Sum kan enkawl thiam avangin Efficiency in Financial Management ah nuai 35,000 kan dawng a. GPF ah sawrkar hnathawk a mamawh apiang kan pe a, pension singthum dawn kan tih felsak bawk a. 16th Finance Commission-in kum 5 dang lo awm leh tura sum dawn tur an relnaah India rama State dawng hnem ber 4-na kan ni thei a ni,” a ti. 

Chief Minister Lalduhoma chuan Hriangtlang khua chu an kawng, PMGSY atanga siam chu hna thawktute vil hun a tawp tawh vangin sawrkarin a siamna tur sum tam tak a dah thar tih sawiin, Piler leh Hmunzawl atanga kalpawh mai theih turin hmalak mek a ni tih a sawi a, “Bialtu MLA tha tak leh viak tha tak, sawrkarin kawng tam takah a bikin Zohnahthlak unaute nena kan inlaichinna kawngah te, kan chheh vel State-a hel thlenga sawrkarin a dawrna kawnga kut ke bera kan hman, hlemhletna kawnga fihlim leh MLA rilru tluang tak in nei hi ka lawmpui che u a, hun lo kal zelah lo duhsak zel turin ka ngen che u a ni,” a ti bawk.

He hunah hian Khualzahawm leh Bialtu MLA, Lalmuanpuia Punte pawhin Budget Session-ah sawrkar lai an che tha tih sawiin, “Chief Minister taima, mahni Department enkawl hrechiang leh zir peih kan nei a. Finance lama Chief Minister puitu Pu TBC. Lalvenchhunga MLA nena an thawhrim zar kan zo a, sum enkawlna kawngah kan kal tluang hle a ni,” tiin, “ZPM Minister dangte pawh sum lama hlemhle leh rinawm lo an awm lova. MLA kan din dawna kan intiamna bawhpelh kan la awm loh zel avang hian sawrkar lehzel tur pawhin keini bak kan awm lo a ni,” a ti a. “ZPM party Worker-te pawh kalphung tharah chuan tumah inhuphurh lo ila, inthikna te, initsikna leh party-a mi dang huphurhna te, party dang ruling lai hri vei thin ang kan nih ve loh chuan ZPM kalphung thar hi Pathianin mal min sawm nawn leh ngei in ka ring,” a ti bawk.