Model Solar Village-a thlan Buangpui-ah hmalak a ni dawn

Pradhan Mantri Surya Ghar Muft Bijli Yojana (PM-SGMBY) hnuaia Serchhip District-a Model Solar Village atana thlan Buangpui khuaa hmalak dan tur chu Ningani khan District Bawrhsap hovin a Pisa-ah sawiho a ni.
Pradhan Mantri Surya Ghar Muft Bijli Yojana (PM-SGMBY) hnuaiah hian Serchhip District-a Buangpui khua hi Model Solar Village atan thlan a lo ni tawh a, hemi chungchang ngaihtuaha District Level Committee on Model Solar Village thutkhawm Serchhip District Bawrhsap Pisa-a neih ah hian Bawrhsap Paul L. Khuma chuan ZEDA Team te leh Committee Member te chu thahnemngai taka thawk tur leh hmasawnna kawnga mipuite thil tha kawhhmuhtu ni tura fuihin, an inpeknaah lawmthu a sawi a. Buangpui khaw hmasawnna leh boruak vawn thianghlimna kawnga an hmalaknaah theihtawp chhuahpui turin a sawm a ni.

He thutkhawm ah hian PM-SGMBY Model Solar Village atan ZEDA ten DPR an buatsaih chu thlirho niin DPR hi uluk taka zirho a nih hnuah Committee chuan siamthat ngai lai te siamtha in lungrual takin an pawmpui a ni. He project kaltlang hian Hybrid Solar PV chu Buangpui Community Hall leh Panchayat Office-ah te vuah tum a ni a. Off Grid Solar Power Plant chu Self-Help Group Building pahnihah vuah tum a ni bawk a. Buangpui khua ah hian 7.5kWp a chak Solar Street Light engemaw zat vuah a ni dawn bawk a. Heng Solar atanga an sum hmuh te hi Buangpui khua hian an khaw hmasawnna hna thawh nan an hmang tangkai thei dawn a ni.