India rama Juda ten Kalhlen Kut hmang dawn lo

Mizo Juda awm thenkhat tiamin India rama Juda Hnam awmte chuan Vawiin atanga serh tan tur, Kalhlen Kut an hmang ve dawn lo.

Ram chhunga rawn zin, West Asia indona avanga India khawpui thenkhata tangkhangte hnen atanga thu dawn danin Israel sipai, Israel Defense Forces (IDF)-te chuan a bik takin India leh Thailand a Juda mi awmte chu Kalhlen Kut hmang tura pungkhawm lo turin an hriattir a. Hei hi firfiak pawlte’n khawvel hmun thenkhata Judate Kalhlen Kut hmang lai beih an tum thu an dawn vang a nih thu an sawi. Israel rama an kir theih mai tak loh avanga India ram khawpui pakhata tangkhang Mizo Juda chhungkua chuan IDF thurawn angin Kalhlen Kut hi an hman dawn loh thu an sawi a ni.

Hetihlai hian Mizoram leh Manipur atanga Israel hnambo ni a inngai ‘Bnei Menashe’ an tih hote pawhin an tum ang hunah pem turin Israel ram an pan thei rih lo a, Bnei Menashe mi Mizoram leh Manipur a cheng 300 ve ve chu Israel a pem thla tura thlan fel an ni tawh a, February thla khan pem tura tih ni mah se tun thlengin an la pem thei ta rih lo a ni.