April 1, 2026 atanga êng chhit man bithliah thar ah mipui tan Eng chhit man tihsan thar a ni dawn lo

Mizoram Electricity Regulatory Commssion (MZERC) chuan April 1, 2026 atanga hman tan turin êng chhit/hman man a bithliah fel a. Mizoram sawrkarin power-a sum indaih lohna chengg vbc. 151.51 a tumsak theih dawn avangin kum thara êng chhit man chawhrual chu Unit khatah Rs. 7.65 a ni dawn.
P&E Department-in kum thar 2026-2027 chhung atan ARR leh Tariff bithliahsak tura an dilna chu March 19, 2026 khan Mizoram State Advisory Committee Meeting-a sawiho a nih tawh bakah Tariff Petition chhungchangah hian March 20, 2026 khan Aijal Club-ah Public Hearing neih a lo ni tawh a, mi pahnih hnen atangin rawtna leh sawiselna awm leh P&E Department-in an chhanna ngaihthlak a ni a. P&E Department hian kum 2026-27 chhunga Power Supply enkawl nana Revenue sum mamawh (ARR) cheng vbc. 761.15 bituksak turin commission an dil a, hemi hmuchhuak turin kum 2025-26 chhunga tariff hi tisang lova sawrkar kum 2026-27-a hman chhunzawmin sum mamawh hmuh phak lohna chu Mizoram sawrkarin subsidy cheng vbc. 175 emaw, Commission-in ARR a bituksak atanga 22.99% emaw, heta a tlem zawk zawk hian a phuhruksak dawn tih an sawi a. An dil ang chuan Eng chhit man tur hi chawhrualin unit khat man Rs. 11.38 a ni. 

MZERC hian P&E Department sum mamawhna te a zirchian hnuin ARR atan cheng vbc. 706.37 a bituk sak a, hei hi kawlphetha hralhna atanga hmuhchuah tur a ni a. Commission chhut danin tariff hman lai mek hmanga Mizorama Power hralhna atangin kum thar 2026-27 hian cheng vbc. 423.043 leh kawlphetha hman bang ram pawna hralhna atangin cheng vbc. 131.82 an hmuh theih beisei a ni a, hei hi a vaiin cheng vbc. 554.86 a ni a. Hei hian cheng vbc. 151.51 (i.e. 706.37 – 554.86 = 151.51)-in ARR a phuhru zo lo a. A phuhruk phak lohna zawng hi sawrkarin subsidy a pek sak theih dawn avangin tariff hman laia êng chhit man hrang hrangte hi kum 2026-27 atan hmang leh turin commission-in thutlukna a siam a, tariff hman lai tihsan a ni lo a ni. 

Financial Year thar kum 2026-27 chhunga Mizorama-a consumer te kawlphetha hman zat tur hi 553.14 MU ni turin chhut a ni a. Sawrkar kum 2025-26 tariff hmangin P&E Depaartment-in kum thar hian consumer te hnen atangin revenue cheng vbc. 423.04 hmu thei turin beisei a ni a, a pumpui-a chawhrualin kum thar 2026-2027 chhunga Unit khat man tur chu Rs. 7.65 a ni.

Kum 2025-2026 aia kum thar 2026-2027 chhunga consumer-te kawlphetha hman zat hi tlem zawk turin chhut chhuah a nih avangin kum thara revenue hmuh tur pawh hi 2025-2026 chhunga Mizorama consumer-te atanga hmuh beisei zat aiin cheng vbc. 25.89-in tlem zawk turin chhut a ni. Tariff Order thar hi March 25, 2026 khan siam a ni a, kawlphetha man thar hi April 1, 2026 atanga hman man chhutna tur a ni.