Sawrkar-ah thlen turin hriattir

Chief Secretary Khili Ram Meena chuan mipuite chu Gas leh tuialhthei sem chungchanga harsatna tawk leh man to zawka hralh chingte sawrkar hotute hnena thlen turin a hriattir.

Chief Secretary chuan India Sawrkar chuan Ministry of Petroleum & Natural Gas kaltlangin ramchhung hmun hrang hranga LPG leh Petroleum Oil lakluh leh sem chhuah dan chu uluk takin a thlithlai reng tih sawiin, State Sawrkar chu hmun hrang hranga heng nitin ei leh bar mamawh (essential commodities) tlachham an awm loh nan khauh taka vil reng turin thupek a chhuah bawk tih a sawi a. March ni 27, 2026 khan Prime Minister hova State hrang hranga Chief Minister leh Chief Secretary-te thutkhawmna ah mipuite mamawh lakluh leh sem chhuah dan uluk taka en zui reng a pawimawhzia uar taka sawi a nih thu leh LPG leh POL stock tam tawk tak a awm a ni tih leh ngaih-that loh emaw, chiaina chhan tur a awm lo tih mipuite hriattir an nih thu a sawi bawk.

Chief Secretary chuan March ni 28, 2026 khan FCS&CA hotute, Deputy Commissioner zawng zawngte leh Oil Marketing Company (OMC)-te thukhawmin DC-te hian an District chhung theuhvah LPG, Petrol leh Diesel stock tam tawk tak a awm tih an sawi thu sawiin, LPG leh POL stock awm zat leh sem chhuah dan uluk taka vil a, chhek ruk (hoarding), man to zawka hralh (black marketing) leh kawng dik lova lak pen a nih loh nana hma la tura hrilh an nih thu a sawi a. LPG leh Diesel/Petrol semchhuah chungchanga harsatna an tawh emaw, chhek ru leh man to zawka hralh an hriat chuan State leh District hotute'n helpline number an siamah an thlen tur a nih thu leh dan bawhchhia an awm a nih chuan Essential Commodities Act, 1955 hmangin an lakah hremna khauh tak an lekkawh tur a nih thu a sawi bakah mipuite chu LPG stock awm sa renchem taka hmang tura chah an ni bawk.