MJA in Deer Park an tlawh

Mizoram Journalists’ Association (MJA) Serchhip District Member te chuan nimin khan Thenzawl-a Deer Park tlawhin helai hmuna Sazuk khawi an kalpui dan te an thlirho.
Environment Forest & Climate Change Department enkawl Thenzawl-a Deer Park hi February 1, 1994 khan hawn niin hectare 10-a zau a ni a, helai hmunah hian Sazuk ( Sambar Deer) enkawl a ni a, Deer Park-ah hian Sazuk hi sawm chuang te awm thin mah se kum 2024 May thlaa thing tlu in a hungna a tihchhiat avanga Sazuk tam tak an chhuah hnuah Sazuk hi an tlem ta hle a, tun dinhmunah panga (5) chauh awmin heng zinga pali chu a pa a ni a, a pui pakhat chauh a awm a ni.

He Deer Park enkawltute hian Sazuk te hi tuktin hnim pek thin an nih thu leh tlai lamah Chana leh thildang an pek thin thu an sawi a, helai hmun hi tlawhtu awm ve deuh rengin mi pakhat tan Rs. 20/- zel a ni a, naupang kum 10 hnuailam erawh a thlawna kal phal a ni thung.