Mizoram-a HIV positive ten damdawi an ei tha tih sawi

Mizoram chu India rama HIV Positive sanna ni mahse HIV damdawi, ART eite an hrisel that a, an damrei chu thil lawmawm a nih thu MSACS hotuten an sawi.

Mizoram State AIDS Control Society (MSACS) Project Director Dr. Jane R. Ralte chuan HIV Positive Prevalence rate chu HIV kai thar leh hlui zawng zawng zat belhkhawm a ni tih sawiin, India ramah Mizoram HIV Positive Prevalence rate sang ber chu hrehawm an tih rualin hei hian thil tha a kawk tih a sawi a, HIV kai zingah HIV damdawi, Antiretroviral Therapy (ART) tha taka ei an tam avangin chung mite chu an hrisel a, nun pangngai a an nun bawk avangin an damrei tih a sawi a. Hei bakah hian Mizoram-a HIV kai thar incidence chu kum 2018 atang khan a tlakhniam char char bawk avangin lawmawm an tih thu a sawi a. Hetih rual hian HIV chungchang inzirtirna a tam tawh avangin Mizoram-ah HIV kai leh kai loh inendik an tam a, mahni dinhmun inhriate’n ART an ei that avanga an hrisel that rualin HIV kai thar zat chu a la sang chhunzawm dawn tih a sawi bawk a ni.

Kum 1999 October thla a Mizorama HIV kai hmuhchhuah a nih atanga nikum December thla thlenga HIV kai hmuhchhuah tawh zawng zawng chu mi 33,878 an tling tawh a. Nikum December thla a HIV hrik kai la dam, ART hmanga inenkawl zat chu mi 18,224 an ni.