Pensioner ten MUHCS 1.0 hman chhunzawm tir turin Mizoram sawrkar an ngen

Mizoram Civil Pensioner Association (MCPA) chuan Mizoram Universal Health Care Scheme (MUHCS) 2.0 chu Pensioner te tan tha an ti lo tih sawiin, MUHCS 1.0 hman chhunzawm tir turin Mizoram Sawrkar an ngen a, Pensioner tam zawkin MUHCS an zawm theihna tura hmalak an inhuam thu an sawi bawk.

Mizoram Civil Pensioner Association (MCPA) hian MUHCS chungchangah Inrinni khan Aizawl Vanapa Hall-ah Emergent Special Assembly neiin he hun hi an President, Prof. Lianzela chuan a kaihruai a, Mizoram Sawrkarin Sawrkar kum thara Mizoram Universal Health Care Scheme a kalpui dan tura pensioner-te dinhmun an sawiho hnuah, “MUHCS 2.0-in Pensioner-te dinhmun min siam hi a tha tawk lovin kan hria a, MUHCS 1.0 kha min hmantir leh tura Sawrkarah ngen ni se, MUHCS zawm theih hun atan kumin May thla thleng min pawhsei sak se kan ti” tiin resolution an pass a, hemi bawhzui tur hian Working Committee an din nghal a ni.

Mizoram Civil Pensioner Association (MCPA) hruaitute chuan, Sawrkarin MUHCS a kalpui mekah duhsak taka pensioner-te a hman tir chu an lawm hle laiin, thla thar Aprila 1 atanga MUHCS 2.0 a kalpui turah pensioner-te an kawppuite chauh huama, an fate an huam tir lo chu an duh loh chhan lian ber a nih thu an sawi a. Pasalte emaw, nupuite emaw an thih avanga family pensioner tam tak an awm a, chungtianga kawppui nei lo tih chiang sa em em leh chung miten an fate kep chuang si lo a Rs. 1,000 an thawh a ngai tur leh an faten a hrana sum senga MUHCS 2.0 an zawm a ngai tho si te chu an ngaithiam lo hle a, hei bakah hian Pensioner nupa-in a hran ve ve a an zawm ngai ta te chu na an tih thu an sawi. 

Pensioner te zingah MUHCS 1.0 zawm an tlem leh damlo inenkawlna sum hman a tam nia sawi chungchanga zawhna chhangin MCPA hruaitute chuan, Sawrkarin MUHCS 1.0 a kalpui mekah pensioner-te dinhmun tha tak a siamsak laia he Scheme hmangtu an member an tlem chu an inthiam lo hle tih sawiin, hetihrual hian Mizoram Universal Health Care Scheme chu scheme thar a nih avangin tam takin a zuzi leh mai emaw, an tih tak tak theih loh rinna avanga hlauthawng an awm avangte leh Empanel Hospital an tlem avangte in pensioner anga MUHCS 1.0 chu zawm an tlem phah a, amaherawhchu, pensioner zingah mipui nawlpui anga zawmtu engemaw zat an awm niin an sawi a. MUHCS 1.0 anga Sawrkarin pensioner-te a kalpui leh a nih chuan pensioner zaa 90 aia tlem loin an zawm theih nan Mizoram Civil Pensioner Association-in an Branch tinah tihhluihnain hma an la dawn a, Mizoram Sawrkar sum bawmah pawh sum eng emaw zat an chhun luh theih an rin thu an sawi bawk.