Mizoram-ah MUHCS 2.0 hman tan a ni leh ta

Mizoram Universal Health Care Scheme (MUHCS) 2.0 chu nimin, April 1, 2026 atang khan kalpui tan a ni leh ta a, nakum (2027) March 31 thleng kalpui tur a ni ang.

Mizoram mipuite damdawi In-a man chawi lova an inenkawl theihna, Mizoram Universal Health Care Scheme hi nikum (2025) khan kalpui tan ni tawhin sawrkar kumthar, 2026-2027 atanga MUHCS 2.0 kalpui tur atan hian February 16 atang khan inziaklut duhte tan online hmanga inziahluhna hun hawn a ni a, hriat theih chinah online hmangin chhungkua (general beneficiary) 10,862 an inziaklut tawh a; nimin April 1, 2026 atang khan khaw 269-ah offline-a inziahluhna hawn tan tura tih a ni bawk a, heng te hi Online hmanga inziahluh harsatna khua te an ni a. Online leh Offline-a inziahluhna hun hi April 15, 2026 thleng hawn a ni dawn a, inziaklut hman lo tan June thle chhungin ‘Grace Period’ hawn leh a ni dawn a, hemi hun chhunga inziahluh man erawh zaa 50 in a sang tawh dawn thung a ni.

MUHCS 2.0-ah hian mipui nawlpui (General beneficiary) tana inziahluh man hi duh thlan tur chi tum a awm a, Rs. 2,500 a inziaklutte tan an damlohin General Ward-ah admit an ni anga, Rs. 5,000 pe te chu Semi-Cabin leh Rs. 10,000 pe te chu Cabin-ah an awm thei ang a. Sawrkar hnathawk, Civil Pensioner leh AB-PMJY Golden Card hmangtu chhungkaw tan General Beneficiary hnuaiah hian inziahluh hranpa a ngai ve dawn lo a. MUHCS-ah hian March 17 thlenga Bill lut te chu pek tura tihfel a ni tawh bawk a ni.