Serchhip-ah ‘World TB Day’ hmangin TB Mukt Bharat Abhiyan thawhhnihna hawn a ni
Serchhip DC Pisapui Hall-a World TB Day puala hun hman hi Bawrhsap Paul L. Khuma chuan hmanpuiin TB do hneh tura sawrkar hmalaknaah mipuite an pawimawhzia a sawi a. “TB vei lo tura invenna kawng hrang hrang kan hriat te hi a taka kan nunchhuahpui a tul a, kan lo vei a nih pawhin Doctor ten tih tur leh tih loh tur min hrilh kan zawm tur a ni,” tiin Village Council tin te TB Free Village a puan theih tura tang turin a fuih a. TB dona beihpuithlak tur hian sawrkar mi leh sa te chauh tih theih a ni lo tih pawh sawiin, “Kawng tinreng ah VC te an pawimawh a; inchawm tawn a, thawkho tur kan ni,” a ti a. Kuminah chuan Serchhip District chhunga VC zawng zawngte TB Free Village an nih theih nan hma i la turin a sawm bawk.
World TD Bay hman a nih rual hian TB Mukt Bharat Abhiyan thawhhnihna chu nimin khan hawn nghal a ni a. He hmalakna hnuaiah hian Serchhip District chhung khaw tina mi cheng za zelah sawmhnih (29%) tal TB an vei leh vei loh endik a ni dawn a. Thuang hniha he hmalakna hi kalpui tur niin Health Department Staff ten an hmanrua nen khawtin an pan chilh anga, TB damlo hmuhchhuah tumin thapui an thawh dawn a. A pahnihnaah chuan District Hospital, PHC, CHC, Health & Wellness Centre, sawrkar damdawi In leh Clinic zawng zawngah TB damlo zawnchhuah hna thawh a ni anga. Jail, Orphanage, HIV hrik pai, natna benvawn vei, zu in leh meizial zu thin te chu a tam thei ang ber an endik (screen) dawn a ni.
Kumin hian Serchhip District-ah ‘TB Free Village’ a puan khaw 23 an awm a, Gold dawngtu - Hmuntha bakah Silver dawngtu Bungtlang, Serchhip Field Veng, Khumtung, Lungpho, Ngentiang, Leng leh Sailulak an awm a. Bronze dawngtu Chhiahtlang North, Buangpui, Chhingchhip Mualpui, Hualtu, Kanghmun South, Khawbel, Lungchhuan, Neihloh, Rullam, Sialhau, Thentlang, Thinglian, Zote South leh Piler te an awm bawk a. Gold hi kum 3 a zawna TB Free Village a puan ten an dawng a; Silver hi kum 2 a zawna TB Free Village ten dawngin Bronze hi kum khat TB Free Village-a puan ten an dawng a ni.
Nimin-a he hun hman hi Senior Chief Medical Officer Dr. LP. Malsawma chuan kaihruaiin District TB Officer, Dr. Lallawmkimi Chhakchhuak chuan Report a pe a, District Medical Superintendent Dr. ZD. Lalmuanawma chuan lawmthu sawi-a hun hmangin TB vei te thian - TB Nikshay Mitra - TB veiten ei leh in hrisel leh chakna tam an dawn theihna tura thla tin cheng 700 a pui thintute hnenah lawmman hlan a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!