Finance Department-in MUHCS 2.0-a Pensioner te hamthatna tih danglam a nih chhan an sawifiah

Mizoram Universal Heathcare Scheme (MUHCS) 1.0-a Pensioner ten hamthatna an neih ang chu MUHCS 2.0 ah an nei tawh dawn lo a, hei hi Pensioner te pawisa thawh leh an hmanral a inthlauh lutuk vang niin, Category hrang hrang zingah chawhrualin pensioner-te'n sum an hmang tam ber tih Finance Secretary Ramchuana chuan a sawi.
MUHCS 2.0-a sawrkar hnathawk Pension tawhte dinhmun tihdanglam a nih chungchang ah hian Mizoram sawrkar-a Finance Secretary Ramchuana chuan nimin khan a Pisa-ah thuthar thehdarhtute kawmin MUHCS 1.0 kalpui a nih chhung khan mipui nawlpui huam theihna turin pensioner-te pawh Central Govt. Health Care Scheme (CGHCS) hnuaia pensioner an kalpui dan deuha kalpui tum a nih thu sawiin, “CGHCS-ah chuan Pensioner-te hian Fixed Medical Allowance (FMA) an dawn theih an surrender a ngaih bakah sawrkar hna an thawh laia an Level puite thawh (contribute) zat an thawhve a ngai,” tiin an chhungkua member, anmahnia innghat a huam thu a sawi a. Pensioner-te nen indawrna hrang hrang an neih hnuah MUHCS 1.0 hnuaiah duhsak takin Scheme siam sak an nih thu sawiin, “An duh dan zulzuiin Category A leh B-ah then an ni. Category A chuan thla tin Rs. 1,000 thawhin kum khatah cheng nuai 12 thleng a thlawnin Private Cabin-ah an inenkawl thei. Category B chuan thla tin Rs. 500 thawhin kum khatah cheng nuai 5 thleng Semi Private-ah an inenkawl thei. Damlo zin veivahna pawh pek sak theih a ni,” a ti.

Finance Secretary chuan hetianga Scheme tha tak siam sak an nih lai hian Pensioner te hian MUHCS hi an zavaia zawm tura beisei an nih thu sawiin, “Mahse, pensioner mi 37,000 velah mi 14,000 vel chauhin an zawm. Tun dinhmunah pensioner in enkawlna senso cheng vbc. 26.84 tling tawhin, damlo pakhat tana senso chawhrualin pensioner-te senso a sang ber a ni,” a ti a, pensioner-te hian April 2025 atanga February 2026 thlengin MUHCS-ah cheng vbc. 9.33 an thawh tawh thu a sawi bawk.

February 16, 2026-a Chief Minister kaihhruaina hnuaia Mizoram State Health Care Society thukhawm chuan Pensioner Category bikte dinhmun leh a inziaklut zat enin, CGHCS hnuaia pensioner an kalpui dante an en thu a sawi a, Enrolment tam zawk an neih theihna tur leh sawrkarin sum tam zawk a hmuh theihna turin pensioner-te General Contributory Benificiary dinhmun atanga lakhran hlawk tha tih a nih thu Finance Secretary chuan sawiin, “Chumi ang chuan Finance Department chuan Office Memorandum a chhuah ta a ni,” a ti bawk.

MUHCS 1.0-ah chuan Pensioner-te'n an chhungkaw member an kep theih zat chu Ration Card-a awm ang ang, an tu leh fate nen lam huamtir vek a nih thu sawiin Finance Secretary chuan, “Hei hi ngun taka ngaihtuah nawn niin, Category dang nen khaikhin chuan a khairual lo hle. An nupui/pasalte chauh huamtir an ni tawh. Sawrkar hnathawk zawkte pawh an chhungkaw member zawng zawng huamtir an ni lo,” a ti a. Hemi chungchang ah hian Federation of Mizoram Govt Employees & Workers (FMGEW) pawhin rawtna an thehluh thu sawiin, “An Ration Card-a chuang huamtir ve an duh a, chumi a theih loh pawhin an fate kum 25 tling tawh pawh nise, nupui la nei lo emaw hnathawh nei lo huamtir an duh ve a ni,” a ti bawk. 

Finance Secretary chuan Pensioner-te hian an puala Scheme kalpui tum a nih dan hi an duh lo a nih chuan Pensioner-te puala Scheme siam kher a tulin a lang lo tih sawiin, Mipui nawlpui anga General Contributory anga zawm ve mai dan tur ruahman chu thil har a ni lo tih a sawi a. Chutihrualin, MUHCS hlawkna dawn a, FMA la bawk (dual benefit) erawh a remin a lang lo. MUHCS hi Scheme dang hmanga an zawm dawn a nih chuan FMA an Surrender a ngai dawn niin a lang, a ti bawk.