Ramdang mi pahnih man te thawnkir leh an ni

Tunhnai a phalna nei lova Mizorama lo lut ramdang mi 2-te chu thubuai siamsak lova thawnkir an ni tawh.

A lo lut hmasa zawk kum 58-a upa Slovak hnam hi kar hmasa Thawhlehni khan Myanmar lama luh a tum mek laiin Siaha District-a Laki khua-ah Assam Rifles in an man a. Ramdangmi Mizorama lut turte tana neih ngei ngei ngai Protected Area Permit (PAP) nei lova lo lut a nih avang leh Myanmar a luh tum a nih avangin Siaha District Police thuneitute kutah an hlan a. Police leh Intelligence pawl hrang hrangin thu an zawhfiahna a chhanna-ah he Slovak pa hian Thailand a khawsa leh khawvel hmun hrang hranga zin kual a nih thu a sawi bakah Myanmar ram chhung ami a thianpa-in an Kut pakhat chhim tura a sawm avanga Mizoram kaltlanga Myanmar luh tum a nih thu a sawi a. Central sawrkar thuneitute nena an inrawn hnu-ah Zirtawpni khan Lengpui atangin Kolkata panin Mizoram a chhuahsan ta a ni.

Slovak pa an man tuk Nilaini khan kum 41 a upa Russian mi Igor Babko chu Tripura atangin Mamit District-a Rajiv Nagar khua-ah thirsakawra chuangin a lo lut a. PAP a neih loh avangin BSF-in lo manin Mamit District Police kutah an pe a. Mamit Police chuan Aizawl lamah tirin Central sawrkar thuneitute nena an inrawntlan hnuah Pathianni khan a thirsakawr vek hmangin Assam lamah an thawn leh ta a ni. Igor Babko hi May ni 4-a Delhi atanga Tokyo a thlawk chho tura thlawhna ticket nei lawk a nih thu Police hotute’n an sawi. Police hotu pakhat chuan online hmanga PAP dilna hi Ministry of Home Affairs thuneitute'n an pekchhuah tlai thin avangin an hmanhmawhin Mizoram-a Central sawrkar hnuaia thawkte hriatthiamna-in phalna an dilna pawmsaka lo lut mai an awm thin thu a sawi a ni.

Hetihlai hian Union Home Minister Amit Shah chuan National Investigation Agency (NIA)-te’n tunhnaia an man Ukraine leh US mite chu India ram himna tichhe zawnga che ni lovin Mizoram kaltlanga Myanmar a luh tum mai an nih thu a sawi bawk a ni.