VC-te pualin Mizoramin cheng vbc. 362 dawng kim

Chief Minister Lalduhoma chuan Finance Commission 15-na ruahman angin VC-te pualin Mizoram in cheng vbc. 362 a dawn kim thu a sawi.

Social Media kaltlanga he thu hi tarlangin Chief Minister Lalduhoma chuan Rural Local Body (RLB) Grants an tih mai hi sawrkar hmasa hunah khan cheng vbc. 34 leh nuai 50 chauh hmuh a nih thu sawiin, Sawrkar laipuiin Finance Commission sum dawng thei tura inkaihhruaina a duan thar ‘Audit-Online’ tih zawh a nih phawt loh chuan tanpuina pawisa a pe chhuak thei ta lo tih a sawi a. He Audit-Online hi kalpui a nih loh avangin Mizoram in a dawn chhunzawm ta lo char char nia sawiin, Sawrkar thar a lo pian hnu January 2024 atangin Directorate of Local Fund Audit & Pensions leh LAD lam ten nasa takin hma an la tih a sawi a. Audit-online te chu bawhzuiin kum 2021-2022 hnuaia RLB Grants thawh hnihna chu Mizoramin a hmu chhunzawm leh thei ta niin a sawi a. Kumin thlengin a dawng chho ta char char tih a sawi bawk.

Chief Minister chuan Finance Commission 15-na hnuaia RLB tanpuina sum dawn tawp berna tur chu he Finance Commission hun chhung ngeiin, March ni 28 khan dawn a ni ta tih sawiin, heti hian Mizoram chuan RLB Grants hi Finance Commission 15-na in a ruahman sak ang zawng zawng, a vaiin cheng vbc. 362 a lo dawng thei ta tih a sawi a. Heng sum chhawrtu Village Council zawng zawngte a lawmpui thu paw sawiin, Sum dawn theih nana chhun zan zawma rim taka hnathawk thin Directorate of Local Fund Audit & Pensions leh LAD Department te chungah lawmthu a sawi bawk a ni.