LESDE Minister in IIE Guwahati Director a kawm

Labour, Employment, Skill Development & Entrepreneurship (LESDE) Department changtu Minister Lalnghinglova Hmar chuan nimin khan Indian Institute of Entrepreneurship, Guwahati tlawhin IIE Director Ishwar Chanabasappa Poojar nen an inkawm a, Mizoram-a Skill leh Entrepreneurship lama hmalakna awm theite an sawidun. He inkawmna ah hian LESDE Minister chuan IIE chu Mizoram-ah kan la chhawr tawk lo tih sawiin, “IIE kaltlanga Skill leh Entrepreneurship lama hma thar lak kan duh a, Mizoram nen inthlunzawmna tha kan mamawh a ni,” tiin Ministry of Skill Development and Entrepreneurship hnuaia awm a nih angin LESDE Department nen tankawp a tul dante a sawi a ni.

IIE Director chuan Mizoram-ah a taka hna an thawh tawh tur thu leh a bul tanna atan School thlanchhuah thenkhatah Rain Water Harvesting tih dan inzirtirna neih a, a hmanruate leh a hnathawktute thlangin IIE kaltlangin ruahtui khawl leh a vawnhimna an ngaihtuahsak dawn bakah naupangte tui renchem, tui thianghlim khawl kawnga kaihhruaina pek pah a entrepreneurship an zirtir tur thu a lo hrilh a. IIE lam hian Mizorama Tourism hmasawnna turin entrepreneurship kengtel project siam an duh thu leh chumi kawngah chuan Mizorama sawrkar department hrang hrang telna meeting neiha ke pen an duh thu an sawi chu Tourism Minister ni bawk Lalnghinglova Hmar chuan tihhlawhtlin a nih tur thu a hrilh a, IIE Director chuan IIE kaltlanga training, Capacity building leh Scheme hrang hrang kalpui thin chu tihlen an tum thu leh chak zawka kalpui turin sawrkar laipui lamin an hrilh thu a sawi bawk a ni.