Inter-Branch YMA Football-ah Final khel tur a hriat ta

LBS Suzuki 22nd Inter-Branch YMA Football Tournament khelh mekah nimin khan Semi Final khelh niin Final khel turte pawh hriat theih a ni ta a,Bethlehem Vengthlang leh Republic Veng ten Final hi an khel dawn a ni.

Rajiv Gandhi Stadium, Mualpui-a nimin a Semi Final inkhel hmasa zawkah Bethlehem Vengthlang chuan Armed Veng South chu si khat fai-a hnehin Final an lut a, he inkhel a goal awm-chhun hi minute 27-na ah K. Lalramzauva chuan a khung a, Player of the Match atan thlan a ni bawk. Bethlehem Vengthlang hian Falkawn, Zanlawn, Ramthar Veng, Bethlehem Veng, Bawngkawn leh Armed Veng South te hnehin Final hi an lut a, heng match-ah hian goal 22 khungin goal 2 chiah an chhuah a, match 4-ah goal an chhuah lo a ni.

Nimin a Semi Final hnuhnung zawk ah Republic Veng chuan Durtlang chu 3-2 a hneh hramin Final an lut bawk a, inkhelh tan atanga minute 12-na ah Laldanmawia chuan goal khungin hma an hruai a, hei bak goal dang lut lawk lovin minute 82-na ah F. Lalrinpuia chuan an goal hnihna khungin awlsam takin an chak mai dawn niin a lang hman a. Amaherawh chu minute 87-na ah Matthew Lalhmangaihzuala chuan Durtlang tan goal rawn khungin minute 90+4 ah Joseph Van-lalhruaia chuan khung belhin hun a tawp zui a, 2-2 in an inhnehtawk a ni. Hun pangngaia chak zawk an awm loh avangin Extra-Time khelh zui a ni a, hetah pawh goal lut awm lawk lovin hun tawp hma hret minute 120+4 ah C. Lalhriatpuia chuan Freekick atanga goal rawn khungin hei hi an chakpui a, 3-2 a chakin Final an lut a ni.

Naktuk Inrinni chawhnu dar 1:30-ah Final khelh a ni anga, Bethlehem Vengthlang leh Republic Veng te an inhmachhawn dawn a ni.