International Day for Biological Diversity hman a ni

Nimin May 22, 2025 khan ‘Harmony with Nature and Sustainable Development’ tih thupui hmangin ‘International Day for Biological hrangah hun hman a ni.

Mizoram State Biodiversity Board leh National Biodiversity Authority (NBA)-te tangkawp buatsaiha International Day for Biological Diversity puala ATI Auditorium-a hun hman hi Environment, Forests & Climate Change (EF&CC) Minister Lalthansanga chuan hmanpuiin ram hmasawnna leh thilnung chi tinrengte humhalhna chu a kalkawp tlat tur a ni, a ti a. Nungcha venhim hna chu kan tih makmawh a nih avanga thawk tur kan ni lova, kan hmalam hun innghahna pawimawh a nih avanga thawk tur kan ni zawk tih sawiin, Tunlai khawvel inher zelah harsatna thar a lo chhuak zel a, hetiang hre reng chungin humhalhna kan ngaih pawimawh a tul thu a sawi bawk a ni.

International Day for Biological Diversity puala Aizalw-a hun hman hi Mizoram PCCF R.K. Tiwari chuan kaihruaiin mithiam hrang hrang te thusawi ngaihthlak a ni a, International Day for Biological Diversity 2025 puala Mizoram State Biodiversity Board-in High School Level Painting Competition, Open Photography Competition leh Biodiversity Management Committee (BMC)-te tan Signboard siam intihsiakna an buatsaiha lawmman te sem nghal a ni bawk.

Nungcha chi tinrengte humhalha venhim an nih theihna turin United Nations Convention on Biological Diversity (CBD) chu kum 1992 khan Brazil khawpui, Rio de Janeiro-a Earth Summit-ah din a lo ni tawh a. He Convention pawimawh taka telho zingah hian India ram pawh hi party pakhat zingah telin Agreement ziaktu ram 196 zingah a tel ve bawk a ni. Hemi denchhen hian May 22 hi 'International Day for Biological Diversity' atan United Nations (UN) chuan a lo puang a, kum 2000 atang khan kumtin thupui thlan bik neiin hman tan a lo ni tawh a ni.