Union Minister hovin Mizoram-a Women & Child Development hnuaia hmalakna thlirlet a ni

Mizoram-a Women & Child Development hnuaia sawrkar hmalakna hrang hrang thlirletna hun chu nimin khan Union Minister of State for Women & Child Development (WCD) Savitri Thakur-i hovin neih a ni a, Union Minister chuan an Department hnuaia Mizoram-a hmalakna hrang hrangte chu lawmawm a tih thu a sawi a ni.

Aijal Club-a Women & Child Development hnuaia sawrkar hmalakna hrang hrang thlirletna hunah hian Union Minister of State for Women & Child Development Savitri Thakur-i chuan Women & Child Development kaltlanga Mizorama naupang leh hmeichhe venhimna, hriselna leh dinhmun chawikawng tur an hmalakna hrang hrangte chu lawmawm a tih thu a sawi a. Chutih rual chuan Anganwadi Centre, kawphetha nen a la thlunzawm loh engemaw zat awm te, AWC 400 chuang Saksham AWC-a hlan kai la ni ve lo te leh Nari Adalat kalpui tan la ni lote chu chak zawka thawktuten an bawhzui a tul thu a sawi a. AWC thawmthatna tur leh thawktu lak belhna tur ruahmanna te chak zawk a buaipui tura chahin, Sawrkar laipui chuan tanpui an inhuam reng thu a sawi bawk a ni.

He thlirletna hun kaihruaitu WCD Minister Lalrinpuii chuan Women & Child Development hmalakna hrang hrang chhinchhiah leh thehluhna kawngah khawl leh software avangin thawktuten harsatna an tawh thin thu a tarlang a. Heng harsatnate hi a rang lam a chinfel a nih theih nan Minister of State for Women & Child Development hnenah hian a thlen nghal a ni.

Nimin-a thutkhawm ah hian Saksham Anganwadi hnuaia hmalakna te, POSHAN 2.0 hnuaia hmalakna leh Mission Shakti hnuaia hmalakna te thlirho a ni a. Mission Vatsalya hnuaia hmalakna thenkhat pawh sawiho niin Saksham Anganwadi kaltlanga Integrated Child Development Scheme (ICDS) hnuaiah hamthatna dawng naupang kum 6 hnuailam 1,05,295 an awm a, naupai leh nu hnute pe lai 10,414 an awm a, hmeichhe tleirawl kum 14-18 inkar hamthatna dawng 18,775 an awm mek a ni. Anganwadi Centre (AWC) 629-ah kum 2024-25 chhung khan tui in tur thianghlim an neih theihna turin rua-hmanna saim a ni a, AWC 203-ah inthiarna felfai siamsak ni bawkin, AWC 1088 chu Saksham Anganwadi Centre a hlankai tura thawmthat mek an ni.

POSHAN 2.0 hnuaiah naupang thanglai ten hriselna tha an neih theih nan an mamawh ang tawk thisen thianghlim an neih a tul zia zirtirnate, ei leh in tha inpek pawimawhzia zirtirna te Mizoram hmun hrang hrang ah kalpui a nih dan tarlan a ni a. Mission Shakti hnuaiah hmeichhe dinhmun tleute lei rem an rah ve theih nana inkaihhruaina hmun, One Stop Centre (OSC) pawh Mizoram District 8-ah din tawh a nih thu leh District thar pathum bakah Aizawl leh Kolasib-a din belh tur a nih thu tarlan a ni. Hmeichhe chunga hleilenna leh harsatna thlenna tur ‘Women Helpline’ ah kum 2024-25 chhung khan Phone Call 10,637 dawn a ni a. OSC-ah hmeichhe enkawl 1,203 an awm bawk a ni.

He huna tarlan a nih danin Mizoram-ah Children’s Home 39, Observation Home 11, Observation Home cum Special Home for Girls 1, Special Home 2, Specialised Adoption Agency 13 leh Place of Safety 1 a awm mek a. Heng hmunah te hian naupang enkawl lai 1,598 an awm mek a ni.

WCD-a thawktute chuan Department kaltlanga hamthatna dawngtute leh hmalakna hrang hrang sawt lehzuala kalpui a nih theih nan sawrkar laipui atanga Fund a hun taka an dawn a tul thute, Siaha, Kolasib, Mamit, Aizawl, Serchhip, Lawngtlai-a Observation Home hungna siam a tul thu leh harsatna bik nei naupang enkawlna tur hmun leh mithiam mamawh a nih thu an tarlang bawk a ni.