Meichher Award 2024 semna inkhawm buatsaih a ni

Nimin khan School Education Directorate Conference Hall-ah ‘Meichher Award 2024’ sem a ni a, he hun hi School Education Minister Dr. Vanlalthlana chuan a hmanpui a ni.

He Award semna hun School Education Director Angela Zothanpui kaihhruai a neih ah hian Minister Dr. Vanlalthlana chuan Meichher Award 2024 sem a lo ni leh ta chu lawmawm a tih thu a sawi a. Thu ziah chu thil awlai lo tak a nih thu sawiin, Meichher chanchinbu hlutna chu tunhma atangin Mizoram history pawimawh leh thu leh hla tha tak tak chhuahna a ni a, Mizote tan thil hlu dahna ang a ni a, Meichher chanchinbu in thu leh hlaa hnuhma a neihte chu a hlu hle a ni, a ti. Minister chuan puitling tawh te ziak leh chhiar zirtir chu thil awlai lo tak a nih thu pawh sawiin, Adult Education Wing hian kum lama upa tawh ten ziak leh chhiar an thiam theih nana an hmalaknaah fak an phu a, ULLAS scheme hnuaia Full Literacy State kan puan theihna pawh Adult Education hnathawh rah a ni tih a sawi a. Ziak leh chhiar Zirtirtu volunteer teacher-te thawhrimna chhuanawm a tih thu leh lawmawm a tih thu a sawi bawk.

Adult Education Wing-in an tihchhuah thlakip chhuak chanchinbu 'Meichher' hi a tirah chuan 'Zoram Eng' tiin tihchhuah a ni a, kum 1975 March leh April thla chhuak kha a bultanna a ni a, amaherawhchu, a túlna leh remchân zâwkna avângin 'Zoram Êng' tih chu kum 1975 October thla chhuak atangin 'Meichher' tia a hming thlâk a ni a, tun thleng hian a hming thlâk tawh lovin 'Meichher' hi tihchhuah chhunzawm a ni ta a ni. Kum 1975 March & April thla chhuak atanga chhiarin May 2025 chu bu 807-na a ni.

'Meichher' hi sawrkår sum sêngin a tîr atangin thla tin bu 3000 zêla tihchhuah a ni a, a thlawna sem niin Hripui COVID-19 lêng harsatna avâng khân 'Meichher' pawh thla engemaw zât chhung chu bu 2800-a tihchhuah a ni a; mahse, kum 2022 November thla atanga tûn thlengin bu 3000-a tihchhuah zui a ni leh ta a ni Meichher Publisher atân hian tihchhuah tan tirh atangin Department hotu ber Director chu tûn thleng hian hman a ni thin a ni.

He Chanchinbu-a thuziak te atangin Award hi sem thin a ni a, Meichher Award 2024 dawngtute chu Meichher Best Article of the Year 2024-ah pakhatna Rev Dr Lalchawimawia Zemabawk Aizawl; pahnihna Prof. Chawngsailova Chawlhhmun Aizawl leh pathumna Rev. V L. Luaia Hranleh Mission Veng te an ni a. Meichher Best Contributor of the Year 2024-ah pakhatna B. Lalthangliana Chhinga Veng, Aizawl; pahnihna Familia Fanai Laltansanga Zotlang, Lunglei leh pathumna Mahmuaka Chhakchhuak Chanmari Lunglei te an ni.