MZP in hlawhtlinna chang te lawmpuina an hlan

Mizo Zirlai Pawl (MZP) General Hqrs. chuan nimin khan Aizawl-a MZP Conference Hall-ah MZP chhungkua atanga hlawhtlinna chang mi hrang hrangte lawmpuina hun an hmang a, mi 9 te hnenah lawmpuina hi hlan a ni.

    Nimin-a MZP in lawmpuina an hlan te hi MZP Sub-Hqrs. Thenzawl-a President hlui leh Minister ni ta B. Lalchhanzova te; MZP General Hqrs. a Vice President lo ni tawh Social Work-a Doctor of Philosophy (Honorius Causa) hmu thar Dr. C. Lalremruata te; Book of the year 2024 dawngtu F. Vanlalrochana MPS te; MZP hruaitu lo ni tawh thin MCS-a inziaktling Lawrence Lalhlanthara leh Lalchhuanawma Ralte te; UPSC CSE 2024-a tling Carolyn Chingthianmawi IAS leh Jerry Lalhratthang Buongpui te; UPSC, Combined Defence Services(CDS) 2024-a tling Andy L Khobung leh HSLC Exam 2025-a pakuna Mary Sui te an ni a. Heng mite hnenah hian lawmpuina thuziak leh thilpek dang te an hlan a ni.