Mizoram-a UPHC 10-ah thawktu 157 an awm

Mizoram-ah Urban Primary Health Centre (UPHC) 10 awm mekin thawktu mi 157 an awm mek.

National Health Mission, Health & Family Welfare Department hnuaia National Urban Health Mission (NUHM) buatsaihin an hmalakna thlirletna hun nimin khan Aizawl-a White Stone Conference Hall-ah neih a ni a, he huna tarlan a nih danin National Urban Health Mission (NUHM) hi Mizoram-ah kum 2014-ah ding tanin NUHM-ah hian Urban Primary Health Centres 10 a awm mek a, heng te hi Aizawl-ah ITI, Zemabawk, Sihphir, Chawlhhmun, Hlimen, Lawipu leh Sazaikawn (Lunglei), Hrangchalkawn (Lunglei), Champhai leh Kolasib-ah te a ni a, UPHC tinah hian Medical Officer, Pharmacist, Staff Nurse, Health Worker, Laboratory Technician, Account Clerk leh Helper te awmin, thawktu 157 an awm mek a ni.

UPHC zawng zawngah hian Doctor hnena damlo inentir hi a thlawn vek a ni a, damdawi leh test an tih theih ang ang te hi a theih chin chin-ah a thlawn a pek thin a ni a. Nau neih leh natna ziaawm deuh te pawh UPHC damdawi In-ah hian a awm theih a. Specialist Doctor hi kartin a thlawn a inentir theih tur a tirh thin niin Vaccine pawh Inrinni tin (Inrinni vawi hnihna tel lovin) lak theih a ni bawk. Mipui ten Urban Primary Health Centre (UPHC) hi an chhawr tangkaiin an hlut thin hle a ni.