Museum a dah chi hnam rohlu te chu ti riral lova mipuite hmuh theih tura Museum-a dah turin sawm

Mizoram State Museum enkawltute chuan Museum a dah chi hnam rohlu neite chu ti riral mai lovin, mipuite hmuh theih tura Museum-a dah zel turin an sawm.

International Museum Day puala Akashvani Aizawl ten an kawmnaah Mizoram State Museum Curator C. Lalruatfela chuan tun dinhmunah Mizoram State Museum-ah thil chi hrang hrang 789 phochhuah mek a nih thu leh phochhuah tur dahthat 3218 a awm mek thu sawiin, a vaiin thil dahthat 3950 a awm mek tih a sawi a. Museum a dah chi hnam rohlu neite chuan paih bo emaw, ti riral mai lovin Mizo zawng zawngte tana rohlu chhenfakawm, mipuiten an hmuh theih turin mahni inbengvara Mizoram State Museum a dah zel tura sawmin, zirlaite leh thangthar te tana Museum a dahthat chu intihhmuh zel turin a chah a ni.

Mizoram State Museum Curator chuan Museum chu Mizo hnam nun phochhuahna a nih avangin ram pawn atangin a tlawhtu an pung chho mek tih sawiin, Mizote chuan hnam angin Museum ngaihhlut nachang an hre thin lo tih a sawi a, tunhma chuan Museum chu thil hlui leh thil mak dahkhawmnaah an ngai thin a, kum engemawti atang khan thangtharte chuan Museum pawimawhna an lo hre chho zel a, hnamzia leh nihphung hriat theihna hmunpui ber a ni chho ta tih a sawi a. Tunlai thangtharte leh zirlaiten ngaihhlut nachang an hria chu lawmawm a tih thu sawiin, Mizoram State Museum chu hmun lailia taka awm a nih avangin khualzin tlawhtu an ngah a, tlawhtu zingah hnamdang chu a tam pawl an nih thin thu sawiin, Research Scholar te leh zirlai dangten an zirna kaihhnawihah Museum chu an hmang tangkai hle tih a sawi bawk a ni.

International Museum Day hi kumtin May ni 18-ah hman thin a ni a, kuminah erawh Pathianni-ah a tlak avangin Mizoram-ah chuan May ni 16 (Zirtawpni) khan hman a ni a, International Museum Day pual hian a thlawnin mipui tlawh theih turin Museum chu hawn a ni bawk. Kumin-a International Museum Day-ah hian thupui atan ‘The Future of Museums in Rapidly Changing Communities’ tih chu hman niin hemi in a kawh tum ber chu tunlai khawvel changkanna thang chak tak karah kan hnam nihphung kawhhmuhtu chanvo pawimawih tak chu Museum kut-a awm mek a nih thu Museum Curator chuan a sawi bawk a ni.