Serchhip District Sports Committee in thutkhawm nei

Serchhip District Sports Committee (SDSC) chu nimin khan thukhawmin an hmalakna tur thil chi hrang hrang an sawiho.
Serchhip DC Meeting Hall-a thutkhawm hi an Chairman leh District Bawrhsap Paul L. Khuma chuan kaihruaiin Serchhip Hmar Veng-a Sports Complex ram Land Lease siam tur chungchanga hmalakna tarlangin, theihtawp a bawhzui chhunzawm zel a nih thu leh a ram thenawmte hnen atangin NOC lak kim a ni tawh tih tarlan a ni a. Revenue Surveyor hoa teh fel tawh niin Revenue lama thuneituten a enfel hna an thawk tawh bawk tih tarlan a ni a. Land Committee in a la enzui leh tur thu Meeting-ah hian tarlan a ni bawk. Hei bakah hian Mizoram State Sports Council chuan NESIDS kaltlanga Complex Field sirah Multipurpose Hall sak tuma ruahmanna an siam mek thu leh DPR buaipui mek a nih thu pawh he hunah hian tarlan a ni.

Hei bakah hian SDSC hnuaia Recognised Association hrang hrang te chetvelna leh an hmalakna te pawh he hunah hian tarlan a ni a. Sports Complex Field hman dan chungchang pawh sawi niin, Football khelh nan chauh ni lo, Serchhip District hmel lanna sawrkar leh khawtlang thil pawimawh ah a tul anga hman chhunzawm zel nise, a hmangtu ten uluk leh duat takin enkawl thin nise tiin an rel bawk a ni.

Serchhip District Sports Committee hnuaia Sports Association hrang hrang ten Promotional Fund an dilna pawh he hunah hian ngaihtuah a ni a. SDSC Office Bearers te leh Association hruaitu ten uluk zawka sawihoin an dilna te zirchiang se, an zirchianna leh hmuh dan te an thlen hnuah SDSC-in inkaihhruaina dan a neih angin Promotional fund te hi pekchhuah nise tiin an rel a. SDSC inkaihhruaina dan ennawn chungchang pawh he hunah hian sawilan niin, hei pawh hi OB te lo enzui tura dah niin Draft mumal taka siam hnuah States Sports Council pawmpui tura thawn nise tiin an rel bawk a ni.