CM in Mizoram-a Rel Service tur a sawipui

New Delhi-a cham mek Chief Minister Lalduhoma chuan Union Railways Minister Ashwini Vaishnaw chu niminpiah khan kawmin Bairabi leh Sairang inkar Rel kawng hmasawnna tur thil pawimawh te an sawidun a. Chief Minister hian Rajdhani Express Service chu Sairang atanga New Delhi thleng tlantir tur leh Howrah Railway Service pawh Sairang atanga Kolkata thlenga tlantir a nih theih nana hma la turin Railway Minister hi a ngen a. Sairang atanga Tripura direct Rel Service a awm theih nana hma laksak turin a ngen bawk. Heng bakah hian Sairang Railway Station chu India ram hmun danga an kalpui mek ang bawkin World Class Railway Atation-a siam turin a ngen a, Railway Reservation Centre leh Parcel Management System din te, Sairang Railway Station-a Railway Internet Service dah ve turte in a ngen bawk. Union Minister chuan tihhlawhtlin mai theih thil a nih thu leh hma a lo lak ngei tur thu a sawi a ni.

Mizoram-a Railway Station hrang hrang Hortoki, Kawnpui, Mualkhang leh Sairang a thawktu tur laknaah khawtual mi te duhsak bik tura a ngenna chu Railway Minister hian a lo zirchian tur thu a tarlang.

Chief Minister Lalduhoma hian Union Minister of Housing and Urban Affairs & Power Manohar Lal pawh a chenna In-ah kawmin thil pawimawh hrang hrang an sawidun a, Chief Minister hian Thenzawl-a ‘Peace City’ dinna tur atana Detailed Project Report siamna tur sum cheng vbc. sawm (Rs 10 Cr.) chu Ministry of Housing & Urban Affairs in a pek avangin lawmthu a sawi a. 10% GBS leh RDSS hnuaia Mizoram Sawrkarin Project Proposal a thehluh te leh kawlphethaa Mizoram hmasawnna tur hrang hrangte a sawipui bawk a ni.