Serchhip-ah Circuit House leh GPA tur sak hna thawk

Mizoram sawrkar General Administration Department (GAD) chuan Serchhip-ah Circuit House leh General Pool Accommodation (GPA) sak hna a thawk tan mek a, heng hna thawh mek chungchang hi nimin khan Bawrhsap Paul L. Khuma hovin sawiho a ni.
Thudawn danin Mizoram sawrkar GAD chuan SASCI hnuaiah Circuit House leh General Pool Accommodation (GPA) sak hna hi an thawk dawn a, Circuit House hi cheng vbc. 6 vel sengin Khawtetlang-ah sak tura ruahman a ni a, hei bakah hian GPA hi hmun li-ah cheng vbc. 2.5 vel bawr theuh sengin sak a ni dawn bawk a, GPA hi P&E Veng-a Treasury ram te, Land Resources Soil & Water Conservation (LRS&WC) Department ram leh Health Department ram ah te sak tum a ni a, heng hna te hi thawh tan ni tawhin Contractor ten bungrua lam khawm tawhin ban khur thenkhat an lai tan tawh a ni.

Heng Building sak tur chungchang ah hian nimin khan Bawrhsap Paul L. Khuma hovin DC Meeting Hall-ah thutkhawm neih a ni a, he hunah hian Bawrhsap chuan Mizoram sawrkar GAD chuan Circuit House leh General Pool Accommodation sak hna viltu leh enzuitu Monitoring Group a siam tih sawiin, Monitoring Group te hnathawh dan tur pawh DC chuan Meeting-ah hian a sawi a. Contractor te chu Serchhip District tana thawk an ni tih hria a theihtawp chhuah tur leh a tha thei ang bera hna thawk turin a ngen bawk a ni.

He thutkhawm ah hian heng Building sak hna thawktu tur (Contractor) hrang hrangte pawh koh niin PWD Serchhip Division-a SDO C. Vanlalrindika chuan General Pool Accommodation (GPA) leh Circuit House sak dan tur plan leh a endik (monitor) dan tur tehfung hrang hrang te powerpoint hmangin a tarlang a. Contractor/Supervisor te hnathawh tawh chin te pawh tarlan a ni bawk.