Serchhip Bial-ah NABARD sum hmangin kawng siam hna hmun li-ah thawh a ni dawn

Mizoram sawrkar chuan National Bank for Agriculture and Rural Development (NABARD) sum hmangin Serchhip-ah hna pali thawk turin ruahmanna a siam a, heng hna thawktu turte hi thlan fel ni tawhin hna thenkhat chu thawk tan a ni tawh bawk.

PWD Serchhip Division-a thawktute hnen atanga LENKAWL in thu a dawn danin NABARD sum hmang hian ‘Construction of Link Road and land Improvement at Zawlpui’ chu thawh mek a ni tawh a, he hna hi kumin May 3 khan thawh tan tura tih niin March 3, 2027-ah zofel hman tura ruahman a ni a, Agreement Amount chu Rs. 9,63,30,359.97 niin Evergreen Construction & Consultancy, Khatla, Aizawl chuan an thawk a ni. He hmalakna hnuaiah hian Zawlpui to Lumtui (2 km); Zawlpui Farm Road (1.33 km); AC. Zohmangaiha Thlam to Zokhuma Thlam (0.5 km); Zawlpui to Chamdur (2 KM) leh Chawmkai to Zuangleng (5 KM) te thawh tur niin Hectare 83-a zau Land Development hna thawh tura tih a ni bawk a, heng kawng siam turte hi meter 3- zau in PCC-a siam tura tih a ni a, heng te hi siamzawh a nih chuan Zawlpui Phai-a inkalpawhna kawng tam zawk chu lirthei tan pawh harsa lo taka zawh theih tura ngaih niin tunah hian hna hi thawh tan a ni tawh a ni.

Serchhip Sub-Hqrs. YMA ten Inkhawmpui-a an lo rel tawh bawhzuina kal zelah ‘Improvement of Serchhip District (Chawmkai) to Zote South Road’ pawh tunah hian hna tan a ni tawh a, he hna thawk tur hian Huapzo Construction & Consultancy Services, Bawngkaw Shalom, Aizawl chu inremna ziahpui ni tawhin Agreement Amount chu Rs. 21,80,92,941.13 a ni a, kumin May 14 khan hna hi tanin March 14, 2027-ah zofel hman tura ruahman a ni bawk. He kawng hi tunhma lama Mat Phai kaltlanga Zote South khaw panna kawng awm thin siamthatna tur niin a vaiin KM 14-a thui a ni a, kawng hi meter 6-a zau-a laih tura ruahman niin KM 8-a thui chu Blacktop tura ruahman a nih bakah KM 6-a thui chu PCC tura tih a ni a. PWD hotute chuan helai kawng-ah hian tui tamna hmun leh dam a tam avangin heng hmun te hi PCC tura ruahman a ni tih an sawi.

NABARD sum hmang hian ‘Improvement of Kikawn to Hmar Veng, Serchhip’ pawh thawh tura ruahman niin tunah hian hna tan mai theih a ni tawh bawk a, he Project hnuaiah hian New Serchhip Kikawn atangin tlaklam-a kawng awmsa zawhin Serchhip Hmar Veng, Sports Complex panna kawng, Leisang Veng lam penna a rawn chhuak turin kawng siam a ni dawn a, hemi atan hian Studio Hamlet, Champhai Vengthlang nen Agreement ziah ni tawhin Agreement Amount chu Rs. 15,51,98,719.23 a ni a, kumin May 14 khan hna hi tanin March 14, 2027-ah zofel tura beisei a ni a. He kawng hi meter 6-a zau tura ruahman niin meter 3 chu Blackop tur a ni thung. He kawng laitu turte hian tunah hian hna hi tan thei tawh mah se Kikawn atanga peng turah kawng awmsa a zim avangin harsatna an la tawk deuh nia thudawn a ni a. He kawng laih turah hian zangnadawmna pek theih a awm loh avangin he hna thawhna tura khawtlang hruaitu, VC hrang hrangte hmalakna ah an lawm hle tih PWD-a thawktute chuan an sawi bawk.

Hei bakah hian NABARD sum hmang hian Bawngchawm tlang panna kawng pawh siam a ni dawn bawk a, ‘Widening and Improvement of Approach Road Paragliding Ground at Serchhip’ tih thawk tur hian Evergreen Construction & Consultancy, Khatla Aizawl nen Agreement ziah ni tawhin Agreement Amount hi Rs. 3,45,63,310.77 a ni a, kumin May 8 khan hna hi tanin March 8, 2027-ah zawhfel hman tura beisei a ni. He kawng hi KM 4.7 a thui niin kawng zau zawng hi meter 6 ni tura ruahman a ni a, PCC hmangin meter 3-a zau in siam tur niin Paragliding Take-Off Point panna kawng tura ruahman a ni.