Mizoram CEO in Delhi-ah ECI hotute a kawm

Chief Electoral Officer (CEO), Mizoram thar Dr. Lalrozama chuan nimin khan New Delhi-ah Election Commission of India a mi pawimawh te a kawm.

Mizoram CEO thar hian Mizoram CEO atanga chhuakta leh tuna ECI-a Deputy Election Commissioner hna chelh mektu Madhup Vyas leh ECI hotu dangte kawmin Mizoram-a Election Department in harsatna a neihte leh hmasawn ngaihna laite a thlen a. District hrang hranga inthlanna hmanrua Electronic Voting Machine (EVM) dahthatna (Warehouse) thawmthat a ngaih thu sawiin, Election Commission of India duh dan anga heng Warehouse himna atan venghimtu tarn zawk dah belh tura Police Department ngen an nih thu a sawi a. Election Department-a thawktu indaihlohna sukiang tura hmachhawpte a sawi bakah Election Department-in building hran a neih loh avanga harsatna a tawh te a thlen bawk a, building hrang neih loh hian inthlan laiin venhimna thlenga nghawng a neih avangin a rang lama building hrang neih a tul thu a sawi a. Hei bakah hian Mizoram chhungah Media kan la neih changtlun tawk loh avangin ECI hmalakna hrang hrang puanzarna kawngah harsatna a awm thin thu a sawi bawk.

Election Commission of India hotute chuan Mizoram chhung inthlanah Mizoram People’s Forum (MPF) ten inthlanna thianghlim a awm theih nana an hmalakna te tha an tih thu sawiin, Mizoram chu State ralmuang a nih anga State dangte entawntlak khawpa in thlanna felfai neih a nih thin avangin Mizo mipuite chungah lawmthu an sawi bawk a. ECI chu ‘One Nation One Election’ kalpui turin a inbuatsaih thu sawiin, CEO leh Election Department hnuaia thawktu zawng zawngte he hmalakna a hlawhtlin theih nan theihtawpa tan lakpui turin an sawm a ni. He hunah hian Parliament Secretariat-a hotute pawh telin Rajya Sabha MP thlanna neih tur an thlirho bawk.