DAMC in Sawhthing lei mek dinhmun an thlirho

Serchhip District chhunga Sawhthing lei leh hralh mek dan thlirhin nimin khan District Agriculture Marketing Committee (DAMC) chu an Chairman leh Bawrhsap Paul L. Khuma hovin an thukhawm.
Serchhip DC Meeting Hall-a thut-khawm a tarlan a nih danin tun dinhmunah Ser-chhip District-a Secondary Collection Centre (SCC) hrang hrangah harsatna awm lovin tluang takin Sawhthing hralh mek a ni a. Lungpho SCC erawh Fur ruahpui lo thleng avangin inkalpawhna kawngah harsatna an tawk mek a. Sawhthing phur tur lirthei tan veivah a harsat tak avangin thuneitu sang zawkah thlen nise tiin an rel a ni.

Sawrkar thuchhuah in a tarlan danin DAMC Serchhip hian tun hnaiah sawhthing hralh kawngah hma a la chak hle a. SCC Kudam-a Sawhthing awm mek te chak taka tihral mek a ni a. Loneitu-ten Kudam-a phurhluh tur Sawhthing an cho tan leh mek tih he hunah hian tarlan a ni bawk.

Nimin-a thutkhawm ah hian Sawrkar Department hrang hrang atanga SCC vil tura ruat Supervisor te leh Auction Team te an tel a. Ser-chhip khaw pawn atangin member ten Video Conference kaltlangin meeting an chhim a. Supervisor te hian an SCC theuh dinhmun an report a ni.