CM in Union Minister a kawm

New Delhi-a cham mek Chief Minister Lalduh-oma chuan Union Minister hrang hrangte kawmin Mizoram tana thil pawimawh hrang hrang te a sawipui.

Chief Minister hian niminpiah khan DoNER Minister Jyotiraditya Scindia chu a chenna In-ah hmuin Thenzawl khua chu DoNER hnuaia ‘Global Model Site’ atana thlan anih avangin lawmthu a hrilh a. Thenzawl Golf Course thuam thaa International Standard a siamna tur proposal kal mek chu sawipuiin, Union Minister hian a lo bawhzui tur thu a lo hrilh a ni. Mizoram thlai tharchhuah a bikin Sawhthing leh Mizo Hmarchate te hralhna bakah Sports Sector tihhmasawn kawngah Mizoram chu theihtawp a lo chhuahpui tur thu Union Minister hian a lo sawi bawk a. DoNER hnuaia Mizoram hmachhawp te pawh an thlirho bawk.

Chief Minister Lalduhoma hian Union Minister for Minority Affairs Kiren Rijiju pawh a chenna In-ah hmuin Mizoram-a PMJVK hnuaia project pawimawh zual te endunin, hmalak zel dan tur te a sawipui a. Union Minister for Consumer Affairs, Food and Public Distribution Pralhad Joshi pawh nimin khan a chenna In-ah kawmin National Food Security Act (NFSA) hnuaia hamthatna dawngtu (beneficiary) tihpunsak turin a ngen a. Chief Minister chuan Mizoram-a Ration Card nei mek zaa 60.26% chauh chu NFSA hnuaiah an awm tih sawiin, hamthatna dawngtu zat hi tuna mi bakah 1,70,000 a tihpunsak turin a ngen a. Union Minister hian theihtawp an lo chhuah tur thu Chief Minister hi a lo hrilh a ni.

Chief Minister hian Union Civil Aviation Minister Ram Mohan Naidu pawh a Pisa-ah kawmin Mizoram chhim lamah Airport din turin a ngen a. AAI kuta Lengpui Airport hlan chung-chang leh PM- UDAN Scheme hnuaia heliport din dan tur te an sawi bawk a. Union Minister hian Mizoram chhim lama Airport siam a nih theih nan hma a lak tur thu hrilhin, AAI thuneitute chu a ranglama Mizoram sawrkar hnena Lengpui Airport offer siam turin a ti bawk a ni.