Assam Rifles ram chhuahsan tura building hlui man Home Minister in pek an inhuam thu a sawi

New Delhi-a zin Chief Minister Lalduhoma chuan sawrkar laipui-a mi pawimawh hrang hrangte kawmin Union Home Minister Amit Shah chuan Aizawl-a Assam Rifles ram chhuahsan tura building hlui man cheng nuai 520 vel peksak an inhuam thu a hrilh a ni.

Chief Minister Lalduhoma hian Zirtawpni zan khan Union Home Minister Amit Shah chu kawmin Home Minister hian Mizoram chu India rama State ralmuang ber a ni chu a chhuanawm thu leh Remna leh muanna a awm theih nana a lo tawrh tawhna te chu a hriatpui tih Chief Minister hi a lo hrilh a, hemi hriatpuina atan hian Mizoram Sawrkar Flagship Programme Bana Kaih (Handholding Scheme) atana Peace Dividend inpek theih a nih leh nih loh chungchang pawh an sawidun a, Assam Rifles ram chhuahsan tura building hlui man Mizoram sawrkar in a pek ve tur cheng nuai 523.04 peksak an inhuam thu sawiin, Airport Authority of India (AAI) kuta Lengpui Airport hlan chungchang pawh a rang thei ang bera chinfel a tum thu a lo hrilh a ni. Home Minister Amit Shah hian Myanmar atanga raltlante chhinchhiahna tur portal Mizoram puala an siam chu peihfel a nih tawh thu a sawi bawk a ni.

Chief Minister chuan MNF Sawrkar hunlaia Mizoram Legislative Assembly in a lo pass tawh, ‘The Mizoram Maintenance of Household Registers Bill, 2019’ tun thlenga India President kuta la tang chungchang sawiin, Union Home Minister hian chinfelsak thuai a lo tiam a. Mizo Territorial Army Battalion din a nih theihna tura a hmalakna avangin Home Minister hnenah hian lawmthu sawiin, Ram venhimna mai piahlamah Mizo thalaite tana hna siamtu pawimawh tak a ni tih sawiin, a taka kalpui a nih thuai nana Director, Intelligence Bureau nena bawhzui ngai la awm te an sawidun bawk a.

Chief Minister Lalduhoma hian Union Finance Minister Nirmala Sitharaman pawh hmuin Mizoram hmasawnna tur hrang hrang an sawi dun a, Chief Minister chuan Mizoram Rural Bank (MRB)-a Mizote a tam thei ber an luh theihna turin Recruitment Rules pawtfan turin Finance Minister hi a ngen a. Finance Minister chuan a ranglama lo ngaihtuah a intiam a. Mizoram in CSR Fund a tam thei ang ber a dawn theihna tura theihtawp a chhuahpui tur thu a lo hrilh a, Mizoram Sawrkar Flagship programme Bana KaihScheme atana sum mamawh dan te an sawidun bawk.

New Delhi-a cham mek Union Minister for Jal Shakti C.R. Patil pawh Chief Minister hian hmuin Jal Shakti Ministry kaltlanga Mizo-ram-a hmasawnna ruhrel din tûr chungchângte an sawidun a, hei bakah hian Union Minister of State for Education and Development of the North Eastern Region Sukanta Majumdar pawh hmuin Mizoram hmasawnna tur hrang hrang a sawipui bawk.

Chief Minister Lalduhoma hian Inrinni ve khan Union Minister for Tribal Affairs Jual Oram chu a Pisa-ah tlawh bawkin Mizoram tana Eklavya Model Residential School (EMRS) din belh turin a dil a, Union Minister hian lo ngaihtuahsak a intiam a. EMRS a thawk tura Mizote kan luh tam theih dan tur pawh sawidunin, Union Minister chuan hemi kawngah hian hma an lak mek thu leh, EMRS a thawk tur staff tenaute phei chu State chhunga mi ngei la tur leh zirtirtu pawh Region wise-a Recruitment kalpui turin inkaihhruaina thar an duang mek tih a lo hrilh a ni.

Hei bakah hian Ruihhlo ngai te enkawlna hmun hrang hrang tihchangtlun dan tur pawh an sawi bawk a, hemi chungchangah hian Union Minister chuan theihtawpa hma a lo lakpui tur thu a sawi a ni. Chief Minister hi sawrkar mi pawimawh ten an tawiawm a ni.