MPCC Sr. Vice President in Serchhip rawn tlawhin NLUP kalpui atanga Tung ching hlawhtling a kawm

Mizoram Pradesh Congress Committee (MPCC) Sr. Vice President Lalnunmawia Chuaungo chuan nimin khan Serchhip rawn tlawhin Congress Party-in NLUP a kalpui atanga Tung ching hlawhtling Rualzakhuma hmalakna chu a tlawh bakah Serchhip-a Congress Party hruaitute nen an inkawm bawk a ni. 

MPCC Sr. Vice President hian nimin khan NLUP atanga Tung chingtu hlawhtling New Serchhip-a cheng Rualzakhuma hmalakna chu a hmunah tlawhin NLUP in Mizoram chhungkaw tam tak dinhmun a khaichhuah nasatzia chu khaw tinah zêp theih loh khawpin a lang niin a sawi a. Rualzakhuma'n Tung Oil bakah a herna fê (cake) leh a hnah leitha atana siama hralhchhuah tham an neih bakah chhungkaw tam takin an zara eizawnna an neih bawk avangin NLUP chu Mizoram tan malsawmna a ni tih sawiin, Pathian leh mipuite zarah Congress Party a sawrkar leh hunah mi hniam leh harsa zawkte thleng phak NLUP changtlung zawk kalpui a ni ang tih a sawi a. Tuna Mizoram in harsatna leh buaina a tawhte chu thawnthu-ah an chantir dawn tih sawiin, “Chutiang tur chuan kan inpeih tawh a, mipui pawhin min au a, an lo hawkhawm mek a ni,” a ti. 

MPCC Sr. Vice President chuan tunlaiin Mizoram in sum kan harsa em em tih pawh an Party hruaitute nen an inkawmna ah sawiin, “Sawrkar pawhin tihngaihna tak hre lovin puk tur zawn chu a hna ber a ni mai a. Hetih laiin ZPM sawrkar chuan ‘kan ti ve lovang’ an tih zawng zawng ti vekin Mipui sum an chawma an hawp bawk laiin mipui thleng phak sum lengvak a tlem em em a. Hei hian rukruk, tualthah, in rawk, ruang chhar, ruihhlo tawlh a ti hluar a. Mahni taksa ngei Social Media-ah langsar taka zawrh nasa takin a ti hluar mek a ni,” a ti a. Heng hi mipui hnen thleng phak lo sawrkar kan hrawn in a rahchhuah a ni tih pawh Lalnunmawia Chuaungo chuan sawiin, “Tunlaia Mizoram chhunga thil thleng chu chan-chinthar ngaihthlak leh chhiar peihawm loh khawpin a tha lo hle a ni,” a ti bawk.