Zirtirtu aikal la mi 22 an awm niin MZP in an hria; Sawrkar hmalakna an thlawp thu an sawi bawk

Mizo Zirlai Pawl (MZP) General Headquarters chuan Zirtirtu aikal la mi 22 an la awm nia sawiin, sawrkar in Zirtirtu aikal la titawp tura a hmalakna chu tha an tih thu leh an thlawp thu an sawi a. Kumin June ni 13 ralhma ngeiin Zirtirtu aikal la te lakah sawrkar chu action la tura an phut thu an sawi bawk.

Mizo Zirlai Pawl (MZP) General Headquarters hruaitute chuan nimin khan Aizawl-a MZP Pisapuia thuthar thehdarhtute kawmin Zirtirtu aikal la te chungchang hi an sawi a, he hunah hian MZP President H. Lalthianghlima chuan MZP chuan Zirtirtu aikal lak chungchanga an hmalakna te sawiin, January 23, 2024-a Executive Meeting vawi 627-na a an rel angin Zirtirtu aikal la te hi February 10, 2024 ralhmaa MZP General Hqrs. ah Report tura hriattîrna an chhuah thu leh amaherawh chu Mizoram sawrkarin aikal lak chungchangah hma a lak mek avangin thlithlai reng chunga ngaihchan zui a ni ta tih tih a sawi a. Zirtirtu aikal lak hi tihtawp tumin Mizoram sawrkarin nasa taka a beihzui thu an hriat thu leh Mizoram Legislative Assembly 9-na thutkhawm tum thumna neihah pawh sawi a hlawhin Sawrkar School-a aikal lak hi tihtawp a nih tawh thu pawh sawichhuah a ni tih a sawi a. Chutih laiin khawi emaw kil khatah sawrkar hmalakna zawm duhlo leh ngaipawimawh lo an awm ngeia sawi a ni thung tih sawiin, March 18, 2025-a MZP Executive Committee Meeting vawi 640-na chuan Zirtîrtu aikal la tihtawp a nih theih nan MZP rorelna sang, Federal Council Sitting Agenda atan a pawm tih a sawi a. Hei bakah hian Zirtirtu aikal la te March thla chhung ngeia report tura thuchhuah a nih thu pawh a sawi a ni.

MZP hruaitute chuan kumin May 2-a MZP Federal Council Sitting vawi 58-na chuan Zirtirtu aikal la te chungchang chu ngun taka a ngaihtuah hnuin, Zirtirtu aikal la te lakah sawrkarin action a lak theih nan hmalak an rel thu pawh sawiin, June ni 13, 2025 (Zirtawpni) ralhma ngeiin aikal la te lakah hian sawrkarin action a lak ngei an phut thu leh tunhma atanga an lo vei tawh ah sawrkarin hetianga hma a la ngam chu lawm-awm an tih thu an sawi bawk.

MZP General Headquarters hruaitute chuan zirtîrtu aikal la te hi chhui zui zelin tun thlengin District 6 (paruk) atangin School 14(sawm pali) a thawk mi 22 (sawmhnih pahnih) aikal la report an dawn thu an sawi a. Zirtirtu aikal la mi 22 zingah hian Headmistress pahnih awmin, Upper Primary School, Zohmun leh Govt. Middle School, Rawlbuk Headmistress te niin an sawi a. Anni bakah hian Govt. Primary School, Chamdur-tlang leh Damdep-II Middle School atangin zirtirtu 4 ve ve; Upper Primary School atangin Zirtirtu 3; Primary School, Zohmun, Bajirungpa Primary School, Govt.P/S-II Cherhlun, Govt. Primary School, Leisenzo, Govt. Primary School, N. Tinghmun, Govt. Primary School, Bandiasora, Govt. High School, Rawlbuk, Govt. High School Cherhlun atang te in Zirtirtu pakhat theuhin ai kal an la a, zirtirtu aikal la report an dawn zingah hian Higher Secondary school zirtirtu an awm lo a ni.

MZP President H. Lalthianghlima chuan MZP-in zirtirtu aikal la te an dap tih an hriat avanga aikal la ngam lo te an awm nia sawi bawkin, “Report kan dawn hnua aikal la ngam tawh lo, lo thawk leh te pawh an awm a. Vawiin kan thusawi avanga aikal la si thawk leh pawh an awm ngei kan ring a ni,” an ti.

Hei bakah hian MZP chuan Mizoram sawrkar hnuaia thawk tura lak Zirtirtute chuan lak an nih ang ngeiin anmahni ngeiin thawk se an duh thu pawh sawiin, “Hlawh tha tak sawrkarin a pek, training engkim a buatsaih sakte ngeiin Pathian rawngbawlna ah ngaiin thahnemngai takin thawk se Mizoram zirna pawhin hma a sawn pui ngei a ring a. Mahni eizawnna leh hlawh tam tak an hmuhna pawh rinawm taka thawk thei lo te hi sawrkar in banin, a thawk duh leh thawk peihte la turin MZP chuan sawrkar a ngen a ni,” an ti bawk.