Serchhip District-ah Sawhthing quintal 34,027 tiral tawh

Serchhip District chhung Secondary Collection Centre (SCC) hrang hrang atangin loneitute tharchhuah Sawhthing quintal 34,027 tihral a ni tawh.
Serchhip District-a Sawhthing hralh mek buaipuitute hnen atanga thudawn danin Sawrkar in loneitute tharchhuah Sawhthing lei hna a kalpui hnuah Serchhip District chhunga Secondary Collection Centre (SCC) hrang hrang atangin a thawh khatna ah Sawhthing quintal 8,845 hralhchhuakin a thawh hnihna ah quintal 25,182 hralhchhuah a ni tawh a, tun thlenga Sawhthing tihral tawh zat chu quintal 34,027 a ni. Serchhip District chhungah hian SCC pasarih awmin heng SCC kaltlang hian loneitute tharchhuah Sawhthing hralh hna hi a kal mek zel a ni a, a thawh hnihna ah hian Chhiahtlang SCC atangin quintal 5000; Chhingchhip SCC atangin quintal 3905; Lungpho SCC atangin quintal 664; N. Vanlaiphai SCC atangin quintal 3694; Khaw-lailung SCC atangin quintal 6522; East Lungdar SCC atangin quintal 1244 leh Thenzawl SCC atangin quintal 4153 tihral a ni tawh a. SCC atang hian Sawhthing hralh hna hi kalpui mek a nih avangin Sawhthing hralh tawh zat leh kudam-a stock la neih zat hi a danglam deuh reng a ni.

Serchhip District Bawrhsap Paul L. Khuma kaihhruaina hnuaiah District Agriculture Marketing Committee (DAMC) chuan Sawthing lei leh hralh kawngah nasa takin tan a la a. DAMC hnuaia din Auction Team te chuan Serchhip District chhunga SCC tin te hi a hmunah tlawhin, SCC hruaitute Meeting an neih pui theuh tawh a. An sum che vel buaipui tura din Audit Team te pawhin hun bi neia fehchhuakin SCC tin ten sum leh pai che vel an chhinchhiah dan an enpui bawk a. Sawrkar ruahmanna angin SCC te hi anmahni ke-a ding a, Sawhthing hralhna hi buaipui chhun-zawm zel tura beisei an nih angin DAMC hian a vilin a enpui reng a, SCC tin vil tur hian sawrkar Department hrang hrang atangin Supervisor te leh Co-ordinator te a ruat theuh bawk a ni.