Chief Minister in Union Defence Minister a kawm

Chief Minister Lalduhoma chuan nimin khan Defence Minister Rajnath Singh chu kawmin thil pawimawh hrang hrang an sawidun.

He inkawmna ah hian Chief Minister Lalduhoma chuan Mizo Territorial Army Battalion din a nih theihna kawnga hma a lakpuina avangin lawmthu a hrilh a. He Battalion hi June 2025 atanga bultan tur a nih thu leh Mizo thalaite tana hna siamtu pawimawh tak a nih tur thu a hrilh a. Strategic Highways chungchang pawh sawilan niin, Chief Minister hian Mizorama kan kawngpuite tha zawka kan enkawl theihna turin Mizoram chhunga National Highway leh State Highway te chu Strategic Highways a puansak turin Defence Minister hnenah hian a thlen a ni.

Union Defence Minister hian Mizorama Private School te chu Sainik School te nen Public Private Partnership (PPP) Model-a thawhdun theih a nih thu a lo sawi a, Private School te chuan online a application an thehluh a ngaih thu leh Private School thlanchhuah te chu Sainik School anga pawm theih an nih thu Chief Minister hnenah hian a lo sawi a ni.