Leilet dinhmun zirchianna Map inhlan a ni

Mizoram Remote Sensing Application Centre (MIRSAC)-in tunlai thiamna geospacial technology hmanga Mizoram chhunga leilet hman mek leh la hman theih tur (potential area) ri chhinchhiahna, map leh report an buatsaih chu nimin khan Agriculture & Farmers Welfare Department hnenah hlan a ni.

Aijal Club-a hemi puala hun hman hi Agriculture & Farmers Welfare Department changtu Minister PC. Vanlalruata chuan telpuiin Report bu hi a changtu Department leh a kaihhnawih dangte hman turin Er. H. Lalsawmliana, Member Secretary, MIRSAC chuan a hlan a. He hunah hian Agriculture Minister chuan hetianga MIRSAC-in vansang thiamna (space technology) hmanga Mizoram chhunga leilet kan neih te tangkai zawka hman a nih theih nana zirchianna leh chhinchhiahna hman theih tur an buatsaih chu lawmawm a tih thu a sawi a. Mizopa technology, tuthlawh leh chempui ringa hun rei tak chhung Mizote kan awm tawh hnua hetianga geospcacial technology hman tangkai a ni chu Mizoram tan hmasawnna lian tak a nih thu a sawi. He report bu leh a chhunga map te hi Sawrkarin ei leh bar intodelhna tura a hmalak mekah buh leh bal tam zawk tharchhuah kawngah a tangkai dawn hle tih pawh sawiin, Sawrkar Department leh hemi lama hmalatu dangte chu a taka hmang tangkai turin a chah bawk a ni.

He inkhawm hi P&PI Department changtu Secretary leh MIRSAC Vice Chairman Lalmalsawma Pachuau chuan a kaihruai a. North Eastern Council (NEC) sum hmang tangkai a tunlai thiamna hmanga MIRSAC-in hun reilote chhunga hetiang zirchianna an nei thei chu fakawm a tih thu a sawi a. MIRSAC-a Principal Scientist Hmingthanpuii chuan he report leh map te siam tura an zirchian dan tlangpui sawifiahin he an hmalakna hi Thlalem thlalak fiah zawk hmang leh a hmuna kala zirchian a nih bakah GIS thiamna hmanga leilet awm theihna hi tehfung hrang hrang hmanga zawnchhuah a nih thu a sawi a. MIRSAC in an zirchiannaah chuan tun dinhmuna Mizoram-a Wet Rice Cultivation (WRC) zau zawng chu 7532.86 Hectare a nih thu a sawi bawk.

Nimin-a he hun hman ah hian chawhnu hun ah District hrang hrang atanga Agriculture Department leh a kaihhnawiha hmalatu kalkhawmte hnenah report leh map te hi a taka an hman tangkai dan tur a lem nena entirin, MIRSAC Scientist ten an zirtir leh bawk a. MIRSAC, Planning & Programme Implementation Department, Agriculture & Farmers Welfare Department, Horticulture, Minor Irrigation, Rural Development, PHE, Directorate of Geology & Mineral Resources, Sericulture, UD&PA, Revenue Department, DM&R, Social & Water Conservation leh MISTIC aiawh mi thahnem tak an tel a ni.