Larsap leh CM in lawmpui

Mizoram Larsap General (Dr) VK. Singh leh Chief Minister Lalduhoma te chuan Literature leh Education lama Mizoram atanga Padma Shri Award dawngtu R. Lalrawna, Aizawl Electric Veng chu an lawmpui thu an sawi.

Larsap chuan R. Lalrawna chu thinlung taka a lawmpui thu sawiin, kum tam tak chhunga Mizo thu leh hla tih hausakna kawnga a inpekna chu chhuanawm a tih thu a sawi a, Saptawng thu ziak ropui tak takte Mizo mipui ten an chhiar theih a, an hlawkpui theihna tura a hmalakna leh thawhrimna te chu fakawm a tih thu a sawi bawk. 

Chief Minister Lalduhoma pawhin Padma Shri Awardee R. Lalrawna chu a lawmpui thu sawiin, a chawimawina dawn chu a phu hle a ni, a ti a. A thuziak pawimawh tak takte chu hnam rohlu a nih thu sawiin, Mizo mipuite hriatna a tih pun sak a ni, a ti. Hlawhtlinna tam tak hmu zel turin duhsakna a hlan bawk a ni.

President Droupadi Murmu chuan nizan hmasa khan Rashtrapati Bhavan-ah R. Lalrawna hnenah Padma Shri Award a hlan a. R. Lalrawna hi Mizo tawng leh thuziak tihhmasawn kawnga a thawhrimna avangin mite hriat a hlawh hle a Novel ziaktu,Eessay ziaktu, Critic leh thawnthu ziaktu lar tak a ni. Lalrawna hian amah ngeiin a ziah lehkhabu 14 leh Saptawng lehlin bu 15 a tichhuak tawh a. Chung zingah chuan lehkhabu pahnih leh Essay pakhat chu Mizoram Board of School Education (MBSE) leh Mizoram University te'n an Syllabus-ah an dah nghe nghe a ni.

Kum 85 mi R. Lalrawna hian thu leh hla lama a thawh hlawk avangin chawimawina chi hrang hrang a lo dawng tawh a, heng zingah hian Bhasav Samman Award (Sahitya Akademi) pawh a tel a, a lehkhabu lehlin ‘Davida’ chu Translation Book of the Year atan thlan a ni bawk a. R. Lalrawna chuan Padma Award dawn chu chawimawina ropui tak anih thu sawiin, amah thlangtute chungah lawmthu a sawi a, a rin loh lama chawimawina a dawng chu a lawm thu a sawi a ni.