Eng chhit man kalpui dan thar ah a man tihsan a awm lo tih P&E Minister in a sawi

Power & Electricity Department changtu Minister F.Rodingliana'n Eng chhit man kalpui dan tharah a man tihsan a awm lo tih sawiin, Electric bill pek dan System thar, Pro rata basis hnuaiah fixed charge chu thla khat (1) anga kal lovin nitin a kal tawh dawn avangin mipuiten tunhmaa an chawi thlawn thin ang kha a awm tawh dawn lo tih a sawi.

P&E Minister F.Rodingliana hian Inrinni khan a chenna In-ah thuthar thehdarhtute kawmin, tun thla atanga hman tan Electric Bill thar kalpui dan chungchang a sawifiah a, System thar- Pro rata basis an hmang tawh dawn tih sawiin, Fixed Charge thla khat anga kal thin kha tunah chuan nitin a kal tawh dawn a, thla khata inkhawl khawm teuh a awm tawh dawn loh avangin a then ah chuan a tam angin a lang dawn a, hetihlai hian mipuite an hlawk tawh zawk dawn niin a sawi a ni.

Power Minister chuan an system thar hman turah chuan Bill pe tha tan bill a tlem dawn a, bill pe tha lo, inhnawh khawl te tan a sang thung dawn tih sawiin, Revamped Distribution Sector Scheme (RDSS) hnuaiah Electric semdarhna kawnga hmasawnna hna chi hrang hrang thawh mekin a ken tel, Electric Bill siamna software thar chu Aizawl, Lunglei, Lawngtlai, Siaha, Serchhip, Champhai, Khawzawl, Saitual leh Kolasib-ah te tun thla atangin hman tan a ni tih a sawi a, RDSS hnuaiah hian Smart Meter hman a nih tawh dawn avangin kum 2/1 hnuah chuan State dang angin Electric Bill chu pek lawkna, Pre-Paid a kalpui a nih tawh dawn a, mipuiten a ruala an tawrh vak loh nan tun atangin an inhmakhua a, hei vang hian Electric Bill thar hi an kalpui tih a sawi a. He billing software tharin a ken tel zingah Central Electricity Regulatory Commission (CERC) duh dan zulzui a siam, Mizoram Electricity Supply Code Regulations, 2013 in a sawi angin Tariff Slab sang zawka bill chhut (calculate) loh tur, nimahsela reading lak hun dik taka lak a nih loh vanga tariff slab sang zawka chhut (calculate) ngai thin ti bo turin Pro rata basis (daily basis) bill calculation chu he billing software tharah hian hman a nih thu a sawi a, Bill chhut dan chipchiar zawka hre duh tan Electric Department Office-ah zawh fiah theih a ni tih a sawi bawk..

Electric Department thuneitute chuan he software thar hman tan avang hian bill la hmulo awm theih a nih thu pawh sawiin, Bill la hmu lo te tan pawh Internet kaltlangin Website: pedmconsumer.ugoerp.com-ah leh Mobile App: pedmconsumer application atang te in bill a pek nghal theih bakah Bill chipchiar zawka en theih turin, pdf format a download theih tih an sawi a, P&E Mobile App hi chhungkaw tin ten an download chuan Bill pek kawngah a awlsam phah hle dawn tih an sawi bawk.