Union MoS in ZMC&H leh Aibawk a tlawh

Mizoram-a rawn zin meik Union Minister of State for Women & Child Development Savitri Thakur-a chuan nimin khan Zoram Medical College & Hospital tlawhin Aibawk RD Block-a hnathawh thenkhat a en bawk.

Nimin-a ZMC&H a tlawhna ah hian Union Minster of State hi thawktute nen inkawmin ZMC&H-in hma a sawnna te leh Mizoram pum mipuite hriselna tura an hmalakna dan tur leh zirna chungchang te sawiho a ni a, damlo enkawl leh hriselna chungchanga harsatna hrang hrangte Minister hnenah hian an lo thlen ni bawk. Union Minister hian Mizoram a sawrkar hmalakna hrang hranga tlawmngai pawl - YMA, MHIP, MUP, Kohhran leh adt. tha thawhna leh thawhhona chu ropui a tih thu sawi a ni.

Inkawmhona neih zawh hian ZMC&H building sak mekte a en a, ZMC chhunga Creche (Child Care Centre) tlawh lehin, Ministry of DoNER hnuaia NESIDS (OTRI) Scheme-a thawh ‘Residential Hostel' pahnih, Hosteller 82 ve ve awm theihna a tlawh leh a, Hospital chhunga Emergency Department, Obstetrics, Gynaecology Ward, Paediatrics Ward, SNCU leh NICU-te a fang kual bawk.

Hemi hnu hian Savitri Thakur-i chuan Aibawk BDO Office tlawh lehin, Plastic Management Unit, PHE leh RD Department tanghova an siam chu a en a. Aibawk Anganwadi Centre-III pawh tlawh lehin, Anganwadi Centre-a beneficiary-ten an dawn thin - Take Home Ration, Hot Cook Meal leh Saksham Anganwadi & Poshan 2.0 hnuaia Anganwadi Centre tihchangtlunna RO Water filter, LED TV, ECCE kalpui dan leh naupang infiamna hmanraw chi hrang hrangte a en bawk a ni. Kum 2024-a sak zawh Panchayat Bhawan Aibawk tlawhin, PMAY (Gramin) mirethei In sak tanpuina luah luh tawh a en bakah MGNREGA hnuaia kawng siam te a en a. Khaw awmdan in a zir loh avangin Union Minister hian a Programme thenkhat ti danglamin Lengpui Airport panin Mizoram a chhuahsan a ni.