Serchhip-ah ‘Tithi Bhojan Awareness Campaign’ neiin he hmalakna kalpui dan tur sawiho a ni

Nimin khan Serchhip-ah ‘Tithi Bhojan Awareness Campaign’ neih a ni a, he hmalakna hnuaia chak zawka hmalak theih dan turte pawh sawiho nghal a ni bawk.
Serchhip SDEO Office bultuma Serchhip Kawnpui VC Hall-a he hun hman hi Serchhip SDEO Melody L. Betlu chuan kaihruaiin Serchhip-a Asst. Hindi Education Officer (AHEO) A. Lalduhawma chuan ‘Tithi Bhojan’ awmzia leh a thil tum te a sawifiah a, ‘Tithi Bhojan’ chu Hindi tawng atanga lak niin ‘Tithi’ tih chu eng ni bik emaw, a champha emaw sawina niin ‘Bhojan’ chu ‘Chaw’ tihna a ni a. Mihring ten ni pawimawh kan lawm thin – Piancham, Inneihni, Inneih champha, Jubilee, Sakhaw ni pawimawh, Ram ni pawimawh, Kut elh a dangte lawma zirlaite tana ruai siamsak emaw, eitur pek emaw chu ‘Tithi Bhojan’ in a sawi tum chu a ni tih a sawi a. Khawtlang mipui ten zirna In-ah neitu an nihna an lantirna atana tangkai tur leh khawtlang mipui telna tur a nih thu a sawi. ‘Tithi Bhojan’ hi zirlai ten Mid-Day Meal an dawn mek belhchhahtu atan ruahman a nih thu leh zirlai ten eitur hrisel an dawn theihna atan thil tha tak tur a nih thu a sawi a. Eitur bakah eitur siamna atana thil tangkai, School in a mamawh dangte pawh pek theih niin heng zingah hian eirawngbawlna hmanrua chi hrang hrang leh kutsilna thlengin a huam a. He hmalakna hi Gujarat State-ah bul tanin tunah hian State leh UT 11-ah kalpui a ni tawh a ni.

He hunah hian Serchhip khawpui chhunga Primary School leh Middle School hrang hranga School Management Committee (SMC) hruaitute telin PM Poshan-a Coordinator C. Zohmingthanga chuan PM Poshan chungchanga an hmalakna leh dinhmun tlangpui a tarlang bawk a, ‘Tithi Bhojan’ leh ‘PM Poshan’ chungchanga zawhna hrang hrangte inzawhfiah a ni bawk.

He huna tarlan a nih danin Tithi Bhojan hnuaia School in thilpek a dawn zawng zawng chu School Headmaster ten register-ah a petu leh an thilpek te uluk takin a chhinchhiah vek anga, School Management Committee (SMC) ten heng thilpek petu tur (Donor) te zawngin naupangte hnena Tithi Bhojan pek hun turte pawh an ruahman thin dawn bawk a ni.