NCORD thukhawm in ruihhlo dona kalpui mek an thlirho

Serchhip District Narco Coordination Center (NCORD) chu nimin khan thukhawmin ruihhlo dona kawnga an hmalakna hrang hrang an thlirho.
He thutkhawm Serchhip DC Meeting Hall-a neih hi an Chairman leh Bawrhsap Paul L. Khuma chuan kaihruaiin Member Secretary leh Serchhip SP Gavit Gogna pawh thutkhawm ah hian a tel a, he hunah hian April 23-a thutkhawm an neih leh tuna thutkhawm an neih inkara hmalakna te thlirho niin Dan-in a phut angin Serchhip District chhunga Scheduled H, H1 leh X damdawi license nei ten an dawr-ah CCTV an vuah theuh tawh a. Serchhip Police te chuan ND&PS Act hnuaiah thubuai pakhat an ziaklut a, Excise and Narcotics Department chuan thubua pathum an ziaklut thung a, hemi hun chhung hian mi pali man an awm bawk a ni.

Drugs Awareness Campaign pawh School hrang hrangah neih mek niin Serchhip DEO leh a thawhpuite fehchhuakin Serchhip District khaw hrang hrangah Awareness Campaign hi an nei mek a. MSACS leh DEO Office tangkawp chuan Awareness Campaign peng pakhat atan High School leh Higher Secondary School tan Sports an buatsaih bawk a ni.

Food and Drug Administration hotute, YMA leh Police te tangkawpin Serchhip khaw chhunga damdawi dawr hrang hrangah zawrh phal loh damdawi zuar an awm em tih endik turin Joint Raid neih ni se tiin nimin a thukhawm hian rel a. An fehchhuah dan tur leh a hun chungchang ah calendar siam thuai nise an ti bawk.

Nimin-a thutkhawm ah hian Serchhip CJM, Excise & Narcotics Department, Police, Sub-Headquarters YMA leh Health Department hnuaia Food and Drugs Administration aiawhte an tel a. Heng bakah hian Taxi, Sumo leh Two Wheeler Taxi driver te koh niin danin a phal loh thil phurh chungchang leh a hrem theihna dan te an hriattir a ni bawk.