Minister hovin Viksit Krishi Sankalp Abhiyan hawng

Nimin khan College of Veterinary Sciences and Animal Husbandry, CAU, Selesihah 'Pre-Kharif Viksit Krishi Sankalp Abhiyan Campaign' hawnna neih a ni.

He Campaign hawnna ah hian Horticulture Minister C. Lalsawivunga chuan kum 2047 hma ngeia India chu ram hmasawn leh intodelha siam chu Sawrkar laipui hmathlir a nih thu tarlangin, 'Viksit Krishi Sankalp Abhiyan' chu he hmathlir tihlawhtling tur a hmalakna pawimawh tak a nih thu a sawi a. Ei leh bar-a intodelhna nei tura thawktu pawimawh ber chu kuthnathawktute an nih thu sawiin, kuthna-thawktute thiamna leh theihna tichak a tipung tur chuan Sawrkar department hrang hranga mithiamte kaihruaina a tul thu a sawi a. Kuthnathawktute ban phakah an mamawhna zawna kaihruaitu tur mithiamte an awm a tul thu a sawi bawk.

Nimin-a he hun hman hi Agriculture & Farmers' Welfare Department-a Special Secretary Ramdinliani IAS chuan kaihruaiin Khual zahawm Agriculture Minister PC. Vanlalruata pawhin kuthnathawktute dinhmun chawikan a nih theih nan Sawrkar department hrang hranga kan mithiamte hmang tangkai a, Sawrkar laipui scheme tihhlawhtlin chu 'Viksit Krishi Sankalp Abhiyan' thil tum pawimawh tak a nih thu a sawi a. Kuthna-thawktute ban phaka tunlai thiamna tha leh thar lam chhawpchhuah leh tangkai taka a hman dan inzirtirna pawh a ken tel thu a sawi bawk.

He Campaign-in a tum ber chu ngawrh lehzuala Department hrang hrang ten Scheme tha tak tak an kalpui thinte loneitute hnena hriattir te, thlai chin dan tha zawk, thlai chi tha zawk leh tunlai thiamna (modern technology) nasa zawka hman tangkai a nih theih nana inzirtir te, sik leh sa inthlak danglamin a khawihchhiat theih loh tur (climate resilient) thlai chin dan mipuite hriattir te bakah kawng hrang hranga sawrkar leh loneitute thawh-hona tichak tura hmalak te a huam a. Pre-Kharif Campaign hi May ni 29, 2025 atanga June ni 12, 2025 chhung hian neih tur niin Thlasik dawn ah Pre-Rabi Campaign (Thlasik Campaign) neih leh a ni ang a. India ram puma Distirict 700-a khaw 65,000 tuam tura ruahman a ni a; loneitu mi vbc. 1.5 te tlawh chhuah tum a ni.

Mizoram-ah chuan khaw 737-a loneitu mi 1,15,200 te tlawhchhuah tura ruahman a ni a, Team hrang hrangah inthenin loneih lama tawn-hriat nei leh mi thiam- KVK, ICAR, FPO, SHGs, NGOs, Progressive farmers, Rural Youth, Entrepreneurs, Bank, adt. atangte in an tel dawn a. Topic hrang hrang - Soil Health Studies, Climate Resilience Farming, Mushroom Cultivation, Composite Culture, Integrated farming, Vermicompost, Animal Health, Fertilizer, Agriculture Drone Demonstration leh a dangte a awm ang.