Union MoS George Kurian-a’n Mizoram a tlawh

Union Minister of State for Minority Affairs leh Fisheries, Animal Husbandry & Dairying George Kurian chuan Inrinni khan Mizoram rawn thlengin Fisheries Department hnuaia hmalakna hrang hrangte a en nghal.

Union Minister hi Lengpui Airport-ah Fisheries Minister Lalthansanga leh Department mi pawuimawh ten lo dawngsawngin Lengpui khaw chhunga mimal Sangha Dil siamte bakah North Eastern Council (NEC) hnuaia Fish Farmers' Training Centre dinna tur hmun, Laldenga Fisheries Demonstration Farm-te tlawhin,hmalak tum dante a enpui a. He hunah hian Fisheries Minister leh Department hotute chuan Mizorama Sangha khawitute harsatna hrang hrang Minister hnenah hian thlenin, Sangha khawi hmasawnna tura Sawrkar Laipui-a State sawrkarin project a thehluh tawhte, Zawlnuam-a Integrated Aqua Park tur telin lo pawm sak thuai turin Minister hi an lo ngen a ni.

Union Minister George Kurian chuan Sangha khawitute sum lama an harsatna sutkianna atan Fish Farmers Producer Organisation (FFPO) hnuaia Equity Grant a kawhhmuh a. Sangha chaw lakna (fish feed acquisition) chungchanga an harsatna chu tualchhunga Sangha chaw siamchhuah dan ngaihtuah tur leh startup ang zawng pawha an kalpui theih thu a hrilh a. Sangha khawituten sawrkar hnuaia anmahni tana hamthatna awmte an hriat chu an ngaih pawimawh thu sawiin, Outreach Programme neihpui turin Officer a lo thawn tur thu a sawi. Union Minister chuan Sawrkar Laipuiin hmarchhak State-te a ngaih pawimawh thu sawiin, Mizoram chuan Sangha khawi lamah hmasawn theihna tam tak a nei tih a sawi bawk a. Fisheries Department chuan hmalak theihna hmun hectare 24000-ah 26.5%-a kalpui a nih tawh thu an lo hrilh a ni.

Hemi hnu hian Minister hian Aizawl rawn thlengin Khatla-ah Ornamental Fish Rearing Unit dinna tura Pradhan Mantri Matsya Samapada Yojana (PMMSY) Scheme hnuaia tanpuina dawng tura thlan Sales Outlet a tlawh a. PMMSY chu Sawrkar Laipui-a Department of Fisheries, Ministry of Fisheries, Animal Husbandry and Dairying hnuaia hmalakna a ni a. A tum ber chu India ramah Sangha khawi lama hmasawnna tluantling, khuarei daih neih a Blue Revolution thlen a ni a. Sangha khawi, enkawl, zawrh leh a kaihhnawih thila hmalak ngaihna te kalpuia, Sangha khawitute hamthatna ngaihtuahsaka, tunlai mila her danglam leh tihchangtlun a tum a ni bawk.

Union Minister of State George Kurian hian Inrinni zan khan LPS Pro Volleyball League 2025 Final khelh chu telpuiin Mizoram chu ramchhung ah infiamna kawngah leh ziak leh chhiar thiam tam kawngah a hmingtha mek tih sawiin, hmasawn zel tura theihtawp chhuah turin a chah bawk a ni.