Synod Resource Centre-ah inziahluh theih leh dawn

Mizoram Synod chuan Union Public Service Commission (UPSC) hnuaia Exam hrang hranga tlin tumte tanpuina tur chu Synod Resource Centre-ah tun thla tawp atanga June thla laihawl thleng enrollment a la dawn a, eng Kohhran tan pawh dil theih a ni.

Akashvani Aizawl zawhna chhangin, Sikulpui Headmaster leh Synod Zirlai Viltu Committee Member, Upa Zonunmawia chuan Mizoram Synod hnuaia Zirlai Viltu Committee-in a enkawl, Synod Resource Centre hi kumin atan tun thla tawp atanga June ni 15 vel thleng enrollment lak a ni dawn tih sawiin, SRC-a member ni tur hian Kohhran inthliarna a awm lova, Higher Secondary zirlai atanga Master Degree zo tawh thlengin Central Service bakah All India Services exam tum te tan member nih a dil theih a ni tih a sawi a, SRC member inziak tlingte hnenah Incentive pek an ni dawn tih a sawi a ni.

Upa Zonunmawia chuan Synod Resource Centre chu Coaching Centre a ni chiah lo tih sawiin, zirlaite lehkhabu mamawh bakah Computer leh Internet hman tur te chu a thlawnin an chhawpchhuah sak a, mahni Inlama lehkha zirna hmun nei lote, Exam inbuatsaihna tur lehkhabu leina tur nei loten an hmang tangkai hle tih sawiin, zirlaite chuan nilengin tlai dar 6:00 vel thleng hun an hmang thin tih a sawi a, kumin ah chuan kumdang aia tihmasawnin, zirlaite zirtir leh kawm turin tualchhung leh Mizoram pawn atangin Resource Person te rawih an ni tawh dawn tih a sawi a ni.

Mizoram Synod hian kum 2018 Synod inkhawmpui-a “Central Service-ah Mizo an tlin tam theih nan Synod-in hma la rawh se,” tih rawtna bawhzuiin hemi atan hian kum 2019 khan ‘Zirlai Viltu Committee’ chu a din a, kum 2020 atangin hemi atana sum mamawh ang te pawh dahin  kum 2021 September ni 20 khan Synod Resource Centre hi khatihlaia Synod Moderator Rev. Dr. C. Lalhlira chuan a hawng a, tunah hian Synod Conference Centre, Mission Veng-ah a awm a ni.