Mizo Territorial Army hmun tur la thlang fel lo

Mizo Territorial Army dinna tura hmalakna kal mekah an awmna lai tur hmun thlan fel ala ni lova, reilote ah tihfel a nih an beisei tih Coordination & Land Search Committee Chairman leh MLA Lt. Col. Clement Lalhmingthanga chuan a sawi.

Coordination & Land Search Committee Chairman Clement Lalhmingthanga chuan Mizo Territorial Army awmna tur hian khaw hrang hrangin anmahni khuaa awm tura rawtna sawrkar ah an thlen thu leh VC te pawh an inphal viau tih sawiin, amaherawhchu New Delh-a zin Chief Minister rawn haw hunah a tul anga ngaihtuah zui zel an tum thu leh tun dinhmunah chuan a hmun tur sawichian theih an la nei lo tih a sawi a. Mizo Territorial Army din tura Recruitment Rally an neih hun tur pawh June thla an ruahman naa a la chiang lo tih a sawi a. Mizo Territorial Army recruitment chungchangah ‘a dil thei te graduate nih a ngai’ tia thu lo tidarh an awm chu a thudik lo a nih thu a sawi a. Hei hi chu India ram pum huapa Officer Exam tur te tan a nih thu leh an lo hriatpawlh nia a hriat thu a sawi a. Mizo Territorial Army-ah chuan pawl 10 chinin an dil theih dawn thu a sawi a ni.

Sawrkar laipui atanga phalna an hmuh angin Mizoram sawrkar chuan Mizo Territorial Army Company pahnih din turin hma a la mek a. Tun thla ni 16 khan Mizoram Sawrkar hnuaia Mizo Territorial Army chungchang thil pawimwah hrang hrang ngaihtuah tura din, Coordination & Land Search Committee hmasa ber chu an Chairman Lt. Col. Clement Lalhmingthanga MLA hovin an thukhawm a. An thutkhawmah hian Territorial Army Company hnih-te temporary a an lo awmna tur, Aizawl leh Lunglei-ah hmun zawngin ruahmanna siam ni se tiin an rel a. Mizo Territorial Army-ah Mizo thalaite an luh theihna turin ruahmanna hrang hrangte lo kalpui turin Mizoram Youth Commission beisei a nih thu leh a tul angin Sainik Welfare & Resettlement nen hma lo la se tiin an rel bawk a ni.