Mizoram chu ziak leh chhiar thiam vekna State hmasa berah puan a ni

Chief Minister Lalduhoma chuan Mizoram chu ziak leh chhiar thiam vekna State atan nimin khan a puang a, India ramah Mizoram chu ziak leh chhiar thiam vekna State hmasa ber a ni.

Sawrkar laipuia Ministry of Education hnuaia Understanding Lifelong Learning for All in Society (ULLAS) hnuaia Ziak leh chhiar thiam vekna State ni tur hian State chhung mipui awm zat atanga teha ziak leh chhiar thiam zat chu zaa 95 (95%) aia tam nih a ngai a, he tehfung atang hian Mizorama ziak leh chhiar thiam zat chu Periodic Labour Force Survey (PLFS 2023-2024) ah zaa 98.2 a ni ta a. Tunhnaia ULLAS hmalaknaa ziak leh chhiar thiam an lo pun tak avangin ULLAS tehfung atangin Mizoram chu ‘Ziak leh chhiar thiam vekna State’ tia puan theih a ni ta a. Mizoram Fully Literate State a nih puan chhuahna leh lawmna hun hi nimin tlai khan Mizoram University Auditorium-ah Union Education Minister of State Jayant Chaudhary leh Chief Minister Lalduhoma te hoin hman a ni. 

Ziak leh chhiar thiam vekna State ni tur hian Mizoram hian School Education Department-a Samagra Shiksha enkawl, ULLAS hnuaiah Nav Bharat Saksharta Karyakram (New India Literacy programme) tihhlawhtlin hna chu thawh a ni a. Governing Council leh Executive Committee of State Literacy Mission Authority din a ni a, Mizoram sawrkar chuan State Project Office Samagra Shiksha Mizoram chu he Programme tihhlawhtling tura thawktu ah a ruat a. State Literacy Mission Authority tanpuitu atan State Centre for Literacy(SCL) din ni bawkin SCERT kutah dah a ni a. SCERT chuan Mizo tawngin zirtirhbu a siam a, a hmingah ‘Vartian’ tih a ni a. Lawngtlai District-a zirlaite tan English version siam a ni bawk a. Zirlaite tana zirtirhbu lak tawi ‘Romei’ tih leh Volunteer Teachers tana kaihhruaina bu ‘Margdarshikha’ tih te SCL chuan a siam bawk. 

Cluster Resource Centre Coordinator (CRCC) te chu New India Literacy Programme Surveyor atan hian hman an ni a. Survey neihna hmunah te In tinah lutin ziak leh chhiar thiam lo dapchhuah hna hi an thawk a. He Survey-ah hian kum 15 leh a chunglam ziak leh chhiar thiam lo chu mi 3026 an ni tih hriat a ni a, chung zinga 1,692 chu zir thei dinhmuna ding, zir duh an ni tih hriat a ni. Samagra Shiksha hnuaia District Project Office-te chuan Volunteer Teacher ni thei tur te zawngin Volunteer Teacher ni tura penchhuak mi 292 an awm bawk a ni. 

Ziak leh chhiar thiam lo awmna hmunah te hian a theih ang angin zirtirna class neih thin a ni a, Sikul, Community Hall, YMA Library leh hmun remchang dangte chu inzirtirna atan hman a ni a. Zirlai tlemna hmun tam takah chuan Volunteer Teacher-te chuan an In lamah zirtirna neiin an tlawh thin bawk. Ziak leh chhiar thiam lo zingah thiam belh an lo awm tak avang hian Mizoram a ziak leh chhiar thiam zat chu zaa 98.2 a lo ni ta a. ULLAS tehfung atangin ziak leh chhiar thiam vekna State-a puan theih hmasa ber a lo ni ta a ni.