Union Minister in School leh Museum a tlawh

Mizoram-a rawn zin Union Minister of State for Skill Development & Entrepreneurship and Education Jayant Chaudhary te nupa chuan nimin khan Aizawl Chanmari-a PM Shri Govt. Model English Primary School an tlawh.

Union Minister hian he School-a Classroom hrang hrang tlawhkualin naupangte a kawm a. Classroom-ah hian naupang thenkhat bulah te thuin an School chanchin te a zawt a, Zirtirtute pawh an thawh dan thenkhat a zawt bawk. Ei siamna hmun te a fan bakah chaw chhumtute nen pawh an inkawmin an eisiam dan te a zawt a, an thawk tha nia a hriat thu a sawi a ni.

Union Minister hian PM Shri Govt Model English Primary School a tlawh hnu hian Zarkawt-a Mizoram State Museum pawh a tlawh nghal a. Mizo nunphung leh khawsak dan hriat theih nana thil pawimawh chi hrang hrang vawn thatte chu a en kualin a hlu a tih thu a sawi bawk a ni. Union Minister te nupa hian School leh Museum an tlawh hnuah hian Lengpui Airport atangin New Delhi an pan a ni.

He hunah hian Union Minister te nupa hi School Education Minister Dr. Vanlalthlana te nupa, School Education Special Secretary David Lalthantluanga, Addl Director Lalhmachhuana, Samagra Shikhsa State Project Director C. Lalthanzira leh Officer dangten an tawiawm a ni.