Sports Minister in Union Sports Minister a kawm

Sports Minister Lalnghinglova Hmar chuan nimin khan Union Minister for Youth Affairs & Sports Dr. Mansukh Mandaviya chu New Delhi-a a chenna In-ah hmuin Mizoram in Sports leh Skill Development kaihkawp a tum chungchang leh Football infrastructure tihhmasawn dan tur chungchang an sawidun.

Union Sports Minister chenna, Tughlaq Road-a an inkawmna ah hian Mizoram Sports Minister Lalnghinglova Hmar chuan Sports Coaching leh Training chu Skill inzirtirna pawimawh tak a nih angin, Mizoram in Skill Development leh Sports kaihkawp turin hma a la mek tih a sawi a. Hemi atan hian Ministry of Skill Development & Entrepreneurship hnuaia Sports, Physical Education, Fitness and Leisure Skills Council (SPEFL-SC) kaltlangin project thehluh tawh a nih thu leh, MSDE Minister leh Secretary bakah SPEFL-SC CEO te nen pawh an thlirho tawh thu Union Sports Minister hi a hrilh a. India hmarchhak leh Mizoram in Sports lama hma a sawn theihna turin Corporate liante inthlunzawm a that thu a sawi chu Union Sports Minister hian hma a lakpui tur thu a lo hrilh a ni.

Union Minister leh Mizoram Sportsd Minister te hian project proposal pawh an thlirdun nghal a. Union Sports Minister chuan Pilot Project anga kalpui thuai theih nise a duh thu sawiin, MSDE Minister Jayant Chaudhary pawh a lo sawipui tur thu a lo hrilh a ni.

Sports leh Skill kaihkawp hi Mizoram sawrkarin Olympic 2036 vision a neih denchhena kalpui tum a ni a. Coach te tan ‘Training of Trainers buatsaih’ te, sawrkar School-a Physical Education zirtirtute training pek a Physical Education mumal tak kalpui te, State pum huapa naupang zawkte tan Sports Coaching leh talent zawnchhuah kalpui te a tel a. Mizoram Sports Minister hian MSDE changtu Secretary Atul Kumar Tiwari pawh a Office-ah hmuin Sports leh skill development kaihkawpna tur project proposal-a belh leh siamthat ngai lai te an sawidun bawk.