Serchhip mi pakhat telna Mizoram Team in U-20 ah Semi Final an lut

Swami Vivekananda U-20 Men’s National Football Championship 2025 khelh mekah Mizoram Team chuan Punjab hnehin Semi Final khel turin an tling a, Mizoram Team-ah hian Serchhip mi pakhat a tel a ni.

All India Football Federation (AIFF) buatsaih Swami Vivekananda U-20 Men’s National Football Championship 2025 hi Chhattisgarh-a RKM Ashrama Ground-ah April 10, 2025 atang khan khelh mek a ni a, Mizoram hian nimin khan Quarter Final khelin Punjab nen hun pangngai ah goal hnih ve ve inpe in an inhnehtawk a, Extra-Time ah goal lut a awm loh avangin Penalty Shootout hmanga chak zawk zawn a ni a, hetah hian Mizoram hian 4-3 in hnehna an chang a, Semi Final an lut ta a ni. He inkhel ah hian Mizoram hian Michael Lalbiaksanga leh PC. Pazawna te goal khung hmangin si hnih faiin hma hruai hmasa mah se Second half-ah goal hnih an chhuah ve leh a, hei vang hian Extra-Time khelin goal dang lut a awm lo a, Penalty Shoot-out ah erawh a vannei zawkah an tang ta a ni.

Swami Vivekananda U-20 Men’s National Football Championship 2025-ah hian India rama State leh UT atangin Team 36 an tel a, heng te hi Group 8-ah then niin Mizoram hi Jharkhand, Tripura, Maharashtra leh Himachal Pradesh te nen an awm a, Mizoram hian Group Stage-a an khingpui zawng zawng hneh vekin Jharkhand lakah 3-1, Tripura lakah 11-1, Himachal Pradesh lakah si riat fai leh Maharashtra lakah si li faiin hnehna an chang a. Quarter Final lut-a hnehna an chan hnuah Semi Final an khel leh dawn ta a, Semi Final-ah hian Meghalaya an hmachhawn anga, Semi Final lehlamah Delhi leh SAI (Sports Authority of India) an inhma-chhawn dawn a, Pathianni-ah Semi Final hi khelh a ni ang.

Tun tuma Mizoram Under-20 Team-ah hian Serchhip atangin RoundGlass-Punjab a khel mek Stephen Ngurchhuanawma S/o Robert Zodinsanga, Bazar Veng chu telin goal hnih a khung tawh a, match tinah a inlan chhoh laiin taksa lama harsatna a neih avangin nimin lamah erawh a inlan thei lo thung a ni.