Thlai thar lei chungchangah Sawrkar in Full mark hmu lo mahse, Pass Mark tha tak a hmu niin niin sawi

Adviser to CM (Hand Holding) Dr. KC. Lalmalsawmzauva chuan Thlai thar lei chungchangah harsatna hrang hrang avangin Sawrkar chuan Full mark hmu lo mahse, Pass Mark tha tak erawh a hmuh thu sawiin, Entrepreneurship Handholding hnuaiah mi 23 te Loan pekchhuah an nih tawh thu a sawi bawk.

ZPM Party chuan nimin khan Aizawl-a an Party Office-ah Chhung Inkhawm neiin he hunah hian Adiviser to CM (Hand Holding) Dr. KC. Lalmalsawmzauva chuan Lalduhoma kaihruai Kalphung thar mipui Sawrkar chu mipuite tana ding a nih angin thlaithar lei chungchangah pawh party mi leh sa bik sawi lovin kuthnathawktute thlai thar lei kalpui mek a ni tih a sawi a, “Harsatna hrang hrang avangin ruahman ang leh beisei ang diak diakin hlawhtlinna famkim chang rih lo mah ila, kan thutiamah erawh nghet takin kan ding a, kan State a Sawrkar ding tawhah chuan kan la ti tha fal hle a ni,” a ti a. “Thlai thar leina atana District Agricultural Marketing Committee (DAMC) a pawisa pekchhuah tawh zat chu vbc. 58.08 a ni a, Sawhthing bikah quintal 1,23,915.23 lei tawhin heta tang hian Sawrkar chuan vbc. 7.5 a hmu let tawh nghe nghe a ni. Thlaithar lei chungchangah hian Full Mark kan hmu lo na a, Pass mark tha tak kan hmu niin kan hria a, kan pass na Division erawh mipuite min pek turah kan dah a ni,” a ti.

Kumin hian India ram hmun dangah Sawhthing thar an tam avangin Sawhthing man nasa takin a thlahniam tih Adviser to CM chuan sawiin, “Bangladesh ram buai in hralhchhuah kawngah harsatna min siam a, Mizoram atanga phai lama phurchhuak tur lirthei kan duh anga kan hmu theih loh bakah Sawhthing Processing lamah kan inpeih hman lo a, hengte hi kan harsatna tawh zualpuite a ni a, mipuite pawhin min hriatthiampui hlein kan hria a ni,” a ti a. “UT kan nih atanga kum 53-na ah pawh hming chherna tham thlai tharchhuah kan la nei lo hi a zahthlak a, chuvangin Sawhthing hi kan State hmingchher nan hman kan tum a ni. Kumin hi Market System siamfel kumah kan ngai a, Mizoram Sawhthing in Cachar leh Siliguri kal pela Visakapatnam leh Delhi Mandi te direct-a a thleng ve ta hi thil chhinchhiah tlak tak a ni. Tunah hian Singapore-ah thawn tura buaipui mek a nia, reilote hnuah thawnchhuah theih kan in beisei a, kuthnathawktute tan thlai thara sumdawnna nghet tak hnutchhiah kan tum a ni,” tiin “Mizote kan rilru a hmanhmawh lutuk hi inzir kan ngaih bakah, kuthnathawktu fel tak tak Sawrkar ruahman anga Sawhthing fai tha min hlui an awm lain mi rinawm lo leh titha duh lo an awm thin ,” a ti bawk.

Adiviser to CM (Hand Holding) chuan Entrepreneurship Handholding chungchang pawh he hunah hian sawiin, “Sawrkar chuan mi 23 hnenah loan hi a pechhuak tawh,” a ti a, “PMEGP a lut turte online portal siam that (maintenance) mek a nih avangin, beisei anga chakin hma kan la thei lo a ni. Commerce & Industry Department lamah hian dilna a luh tam deuh avangin Department dangte rualin an kal ve hman lo a, a diltu ten lo dawh hram hram turin kan ngen a ni,” a ti.

An hmalakna chungchang ah hian Adiviser to CM (Hand Holding) Chief Minister leh Marketing Board Member/Co-opted Member te leh party support-na bakah Mizoram State Policy Coordination Committee (MSPCC) member te thawhrimna ah lawm thu sawiin, “Bang lova min tawngtaipuitu te chungah kan lawm takzet a ni,” a ti bawk.

Nimin-a ZPM Party Chhung Inkhawm hi General Secretary Laltlanmawia chuan kai-hruaiin PWD Minister Vanlalhlana leh MLA Lalchhuangthanga leh VL. Zaithanzama te bakah AMC Corporator te leh Party hruaitu engemaw zat an tel a, zawhna leh chhanna hun hman a ni bawk.